వైకుంఠం క్యూకాంప్లెక్స్ వద్ద మంటలు

తిరుమల: తిరుమల వైకుంఠం క్యూకాంప్లెక్స్ వద్ద శుక్రవారం అగ్ని ప్రమాదం సంభవించింది. దీంతో క్యూకాంప్లెక్సులోని ఫర్నీచర్ పూర్తిగా దగ్దమైంది. మంటలు తీవ్రంగా ఎగిసిపడ్డాయి. వెంటనే మూడు ఫైరింజన్లు అక్కడికి చేరుకుని మంటలను అర్పే ప్రయత్నం చేశాయి. ఎట్టకేలకు మంటలను అదుపు చేయగలిగారు. ఈ మంటలతో భక్తులు తీవ్ర భయాందోళనలకు గురై పరుగులు తీశారు.

అగ్ని ప్రమాదం ఎలా సంభవించిందనే కోణంలో దర్యాప్తు ప్రారంభించారు. నిజానికి, తిరుమల కొండపై సిగరెట్లు తాగడాన్ని నిషేధించారు. ఈ ప్రమాదంతో రెండు గంటల పాటు శ్రీవారి దర్శనాన్ని ఆపేశారు. తిరుమల కొండపై శుక్రవారంనాడు లక్ష నుంచి లక్షా 20 వేల మంది భక్తులుంటారని అంచనా. క్యూల్లో 80 వేల మంది దాకా ఉన్నారు. తిరమల కొండపై ఫైర్ స్టేషన్ ఉంది. దాంట్లో మూడు ఫైరింజన్లు ఉన్నాయి. మంటలను ఆర్పడానికి వాటిని వినియోగించారు. అగ్ని ప్రమాదానికి అధికారుల నిర్లక్ష్యమే కారణమని తెలుగుదేశం పార్టీ అధ్యక్షుడు నారా చంద్రబాబునాయుడు విమర్శిచారు.