మొయిలీపై చంద్రబాబు విసుర్లు

ఏలూరు: పెట్రోల్, డీజిల్ ధరలు తగ్గించే వరకు తమ పోరాటం సాగుతుందని తెలుగుదేశం పార్టీ అధ్యక్షుడు నారా చంద్రబాబునాయుడు హెచ్చరించారు. ప్రతిపక్షాలు చేపట్టిన బంద్ ను పురస్కరించుకుని ఆయన శుక్రవారంనాడు ఏలూరులో ధర్నాలో పాల్గొన్నారు. వేదిక వద్దకు ఆయన ఎడ్లబండిపై వచ్చారు. అమెరికాలో కన్నా ఆంధ్రాలోనే పెట్రోల్ ధర అధికంగా ఉందని ఆయన చెప్పారు. పశ్చిమ బెంగాల్ రాష్ట్రంలో విధించిన విధంగా పన్నులు విధించే సత్తా కాంగ్రెస్ ప్రభుత్వానికి ఉందా అని ఆయన ప్రశ్నించారు.

ముఖ్యమంత్రి డాక్టర్ వైయస్ రాజశేఖర రెడ్డి చేతకానితనం వల్లనే ధరలు పెరుగుతున్నాయని ఆయన విమర్శించారు. కాంగ్రెస్ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ పనికిమాలిన వారని, సూట్ కేసులు అందగానే వీరప్ప మొయిలీ ముఖ్యమంత్రిని ప్రశంసలతో ముంచెత్తుతారని ఆయన వ్యాఖ్యానించారు. కాంగ్రెస్ బ్లాక్ మార్కెట్ పార్టీ అని ఆయన వ్యాఖ్యానించారు. పెట్రోల్, డీజిల్ లపై అమ్మకం పన్ను తగ్గిస్తే సరుకుల ధరలు తగ్గుతాయని ఆయన అన్నారు.