అల్లు అరవింద్ అడిగారు: నారాయణ

హైదరాబాద్: ముందస్తు ఎన్నికలు వస్తాయా అని తనను సినీ నిర్మాత, మెగాస్టార్ చిరంజీవి బావమరిది అల్లు అరవింద్ అడిగినట్లు సిపిఐ కార్యదర్శి కె. నారాయణ చెప్పారు. కేంద్ర ప్రభుత్వాన్ని ఎప్పుడు పడగొడుతున్నారని అల్లు అరవింద్ అడిగినట్లు ఆయన మంగళవారం మీడియా ప్రతినిధులతో చెప్పారు. పెట్రో ఉత్పత్తుల ధరల పెంపుపై, అణు ఒప్పందంపై కేంద్ర ప్రభుత్వానికి మద్దతు ఎప్పుడు ఉపసంహరించుకుంటున్నారని అల్లు అరవింద్ తనను అడిగినట్లు ఆయన చెప్పారు.

అల్లు అరవింద్ తో రాజకీయాల గురించి చర్చించలేదని ఆయన స్పష్టం చేశారు. తమ పార్టీ ఉద్యమాలు చేపట్టేది వ్యక్తులకు వ్యతిరేకంగా కాదని, విధానాలకు వ్యతిరేకంగానని ఆయన చెప్పారు. రాష్ట్రంలో తాము చేపట్టినన్ని ప్రజా ఉద్యమాలు ఏ పార్టీ కూడా చేపట్టలేదని ఆయన చెప్పారు. రాష్ట్రంలో విభజించు పాలించు అనే బ్రిటిష్ పాలకుల నీతి అమలువుతోందని చిరంజీవి సోదరుడు నాగబాబు చేసిన ప్రకటనపై స్పందించడానికి ఆయన నిరాకరించారు.