మాకేం కక్ష లేదు: వైయస్

న్యూఢిల్లీ: ఆంధ్రజ్యోతి జర్నలిస్టుల అరెస్టుకు దారి తీసిన వివాదాన్ని సామరస్యపూర్వకంగా పరిష్కరించడానికి తాను సిద్ధంగా ఉన్నానని ముఖ్యమంత్రి డాక్టర్ వైయస్ రాజశేఖర్ రెడ్డి ప్రముఖ పాత్రికేయుడు కులదీప్ నయ్యర్ తో చెప్పారు. కులదీప్ నయ్యర్ గురువారం ఉదయం ముఖ్యమంత్రి డాక్టర్ వైయస్ రాజశేఖర రెడ్డిని కలిసి అరగంట సేపు మాట్లాడారు. తమకు జర్నలిస్టుల మీద ఏ విధమైన కోపం లేదని, యాజమాన్యాల వైఖరిపై తమకు అభ్యంతరాలున్నాయని రాజశేఖర రెడ్డి చెప్పారు. తమకు పత్రికలపై ఏ విధమైన కక్ష సాధింపు చర్యలకు దిగడం లేదని, ఒకవేళ అలా దిగి ఉంటే తాము యాజమాన్యాల మీదనే దాన్ని చూపి ఉండేవారని ఆయన చెప్పారు.

ఆంధ్రజ్యోతి సంఘటనకు సంబంధించిన వివరాలు మూడు గంటల తర్వాత గానీ తనకు తెలియలేదని ఆయన అన్నారు. అరెస్టుల విషయంలో మీపై అపవాదు వస్తున్నదని, దాన్ని తొలగించుకోవాల్సిన అవసరం ఉందని కులదీప్ నయ్యర్ రాజశేఖర రెడ్డితో అన్నారు. సమస్యను సామరస్యపూర్వకంగా పరిష్కరించడానికి తన వంతు కృషి చేస్తానని రాజశేఖర రెడ్డి హామీ ఇచ్చారు. ఎస్సీ, ఎస్టీ అట్రాసిటీస్ కేసు విషయంలో విస్తృత చర్చ జరగాల్సి ఉందని, ప్రతి చిన్న విషయానికి దాన్ని ప్రయోగించడం సరి కాదని కులదీప్ నయ్యర్ అన్నారు.