ఏడు గంటలు విద్యుత్తు: రఘువీరా

హైదరాబాద్: వ్యవసాయానికి ఏడు గంటల పాటు విద్యుత్తు సరఫరా చేసి తీరుతామని వ్యవసాయ శాఖ మంత్రి ఎన్. రఘువీరా రెడ్డి చెప్పారు. వర్షాభావ పరిస్థితులపై గురువారం ముగ్గురు మంత్రులు సమీక్ష జరిపారు. వ్యవసాయ శాఖ మంత్రి ఎన్. రఘువీరారెడ్డి, విద్యుచ్ఛక్తి మంత్రి షబ్బీర్ అలీ, భారీ నీటి పారుదల శాఖ మంత్రి పొన్నాల లక్ష్మయ్య ఈ సమీక్షా సమావేశంలో పాల్గొన్నారు. గృహాలకు, పరిశ్రమలకు కోత విధించైనా వ్యవసాయానికి ఏడు గంటల పాటు విద్యుత్తు అందిస్తామని రఘువీరా రెడ్డి మీడియాతో చెప్పారు. నిరుటి నిబంధనల ప్రకారమే మేఘమధనం సాగుతుందని ఆయన చెప్పారు.

వర్షాభావ పరిస్థితులను తట్టుకునేందుకు ప్రత్యామ్నాయ ఏర్పాట్లు చేస్తున్నామని, రైతులకు తగిన సూచనలు చేస్తున్నామని ఆయన చెప్పారు. ఆగస్టు తొలి వారానికి వర్షాలు వచ్చినా పంటలు వేసుకోవడానికి తగిన విత్తనాలు అందుబాటులో ఉంచుకోవాలని రైతులకు సూచించినట్లు ఆయన తెలిపారు. ఇతర రాష్ట్రాల నుంచి విద్యుత్తును కొనుగోలు చేస్తున్నామని షబ్బీర్ అలీ చెప్పారు.