చిరు వచ్చాకే మాట్లాడ్తా: డిఎస్

న్యూఢిల్లీ: పార్టీ గురించి అధికారిక ప్రకటన చేసిన తర్వాతనే చిరంజీవి పార్టీపై తాను ప్రతిస్పందిస్తానని ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ అన్నారు. పార్టీ అధ్యక్షురాలు సోనియా గాంధీని ఆయన సోమవారం ఉదయం కలిశారు. రాష్ట్రంలోని వరద పరిస్థితిపై ఆయన సోనీయాకు వివరించారు. దీనికి సంబంధించి ఒక నోట్ కూడా సోనియాకు అందజేశానని ఆయన మీడియా ప్రతినిధులతో చెప్పారు. జిల్లా కాంగ్రెస్ కమిటీ (డిసిసి)ల అధ్యక్షుల ఎంపికపై కూడా ఆయన సోనియాతో మాట్లాడినట్లు సమాచారం.

వరద తాకిడి ప్రాంతాల్లో ప్రభుత్వం చేపట్టిన సహాయ చర్యల గురించి సోనియాకు వివరించినట్లు ఆయన తెలిపారు. ప్రజలకు అధికారులు సహాయం అందించేలా చూడాలని పార్టీ కార్యకర్తలకు సూచించినట్లు ఆయన తెలిపారు. పార్టీ తరఫున కూడా వరద తాకిడి ప్రాంతాల బాధితులకు సహాయం అందిస్తామని ఆయన చెప్పారు. డిసిసిల్లో బడుగు, బలహీన వర్గాలకు అధిక ప్రాధాన్యం ఉంటుందని ఆయన అన్నారు.