మర్పేమిటో చిరుకే ఎరుక: డిఎస్

హైదరాబాద్: ప్రజలు ఏ మార్పు కోరుకుంటున్నారో ప్రజారాజ్యం అధినేత చిరంజీవికే తెలియాలని ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ వ్యాఖ్యానించారు. తెలంగాణలో తమ పార్టీ అధ్యక్షురాలు సోనియా గాంధీ తప్పకుండా పర్యటిస్తారని, తెలంగాణపై ప్రకటన కూడా చేస్తారని ఆయన మంగళవారం మీడియా ప్రతినిధులతో అన్నారు. ప్రభుత్వ అవినీతిపై విమర్శలు చేస్తున్న పార్టీల్లోనే అవినీతి ఉందని ఆయన అన్నారు.

ఎన్ని పార్టీలు వచ్చినా తాము వచ్చే ఎన్నికల్లో 230 శాసనసభా సీట్లు గెలుస్తామని ఆయన ధీమా వ్యక్తం చేశారు. డి. శ్రీనివాస్ మంగళవారం ఉదయం క్యాంపు కార్యాలయంలో ముఖ్యమంత్రి డాక్టర్ వైయస్ రాజశేఖర రెడ్డిని కలుసుకున్నారు. సోనియా గాంధీ పర్యటనపై ఆయన ముఖ్యమంత్రితో చర్చించారు. ఈ నెల 11వ తేదీన సోనియా గాంధీ తిరుపతి వస్తున్నారు. తిరుపతిలో ఆమె మహిళా సదస్సులో పాల్గొంటున్నారు.