శరీరానికి బాగా వేడి చేస్తుందా.. ఈ "బొబ్బర్ల గారెలు" దెబ్బకి మటాష్ !!
ఎండాకాలంలో శరీరంలో వేడి ఎక్కువవడం, అలసట, నీరసం, జీర్ణ సమస్యలు వంటి ఇబ్బందులు చాలా మందిని వేధిస్తుంటాయి. అలాంటి సమయంలో శరీరానికి చల్లదనం ఇచ్చే, పోషకాలు సమృద్ధిగా ఉండే ఆహారం తీసుకోవాలని వైద్య నిపుణులు సూచిస్తున్నారు. అలాంటి సంప్రదాయ వంటకాలలో బొబ్బర్ల గారెలు ఒకటి. ఇవి రుచిగా ఉండటమే కాకుండా ప్రోటీన్లు, ఫైబర్, ఐరన్ వంటి పోషకాలను అందిస్తాయి. ముఖ్యంగా గ్రామీణ ప్రాంతాల్లో ఇప్పటికీ ఈ వంటకాన్ని ఎంతో ఇష్టంగా తయారు చేస్తుంటారు.
బొబ్బర్లలో ఉండే ఫైబర్ జీర్ణక్రియను మెరుగుపరుస్తుంది. ప్రోటీన్లు శరీరానికి శక్తిని అందిస్తాయి. ఎక్కువసేపు ఆకలి వేయకుండా ఉంచడంతో పాటు శరీరంలో వేడి తగ్గించడంలో కూడా ఇవి ఉపయోగపడతాయని చెబుతారు. అంతే కాకుండా శరీరానికి చల్లదనాన్ని అందించడంలో సహాయపడతాయి. ఐరన్, ఫోలేట్ వంటి పోషకాలు రక్తహీనత నివారణకు తోడ్పడతాయి. రోగనిరోధక శక్తిని బలోపేతం చేయడంలో ఉపయోగపడతాయి. పిల్లలు, పెద్దలు ఇద్దరికీ మంచి పోషకాహారంగా ఉపయోగపడుతుంది.
కావాల్సిన పదార్థాలు..
బొబ్బర్లు - 1 కప్పు
చిన్న ఉల్లిపాయలు - 2 (సన్నగా తరిగినవి)
పచ్చిమిర్చి - 4 (సన్నగా తరిగినవి)
అల్లం - చిన్న ముక్క (తురిమినది లేదా పేస్ట్)
జీలకర్ర - 1 టీ స్పూన్
కరివేపాకు - 8 నుంచి 10 ఆకులు (సన్నగా తరిగినవి)
కొత్తిమీర - అర కట్ట (తరిగినది)
ఉప్పు - రుచికి సరిపడా
నూనె - గారెలు వేయించడానికి సరిపడా
చిటికెడు మిరియాల పొడి
కొద్దిగా సోంపు
ఒక టేబుల్ స్పూన్ బియ్యప్పిండి (గారెలు మరింత క్రిస్పీగా రావడానికి)
తయారీ విధానం..
ముందుగా బొబ్బర్లను బాగా కడిగి కనీసం 2 నుంచి 4 గంటల పాటు నీటిలో నానబెట్టాలి. సమయం ఉంటే రాత్రంతా నానబెడితే ఇంకా మెత్తగా అవుతాయి. తర్వాత నీరు వంపేసి మిక్సీలో వేసి కొద్దిగా మాత్రమే నీరు చల్లి కచ్చాపచ్చాగా రుబ్బుకోవాలి. పిండి మరీ మెత్తగా కాకుండా కొద్దిగా గట్టిగా ఉంటే గారెలు రుచిగా వస్తాయి.
రుబ్బిన బొబ్బర్ల పిండిలో సన్నగా తరిగిన ఉల్లిపాయలు, పచ్చిమిర్చి, అల్లం, జీలకర్ర, కరివేపాకు, కొత్తిమీర, ఉప్పు వేసి బాగా కలపాలి. ఇష్టమైతే చిటికెడు మిరియాల పొడి, కొద్దిగా సోంపు కూడా కలపవచ్చు.
క్రిస్పీ టెక్స్చర్ కోసం ఒక టేబుల్ స్పూన్ బియ్యప్పిండి కలిపితే మరింత బాగుంటుంది.
ఒక కడాయిలో నూనె వేసి మీడియం మంటపై వేడి చేయాలి. చేతికి కొద్దిగా నీరు లేదా నూనె రాసుకుని పిండిని చిన్న చిన్న ఉండలుగా తీసుకుని గారెల ఆకారంలో ఒత్తాలి. వాటిని జాగ్రత్తగా వేడి నూనెలో వేయాలి.
గారెలను రెండు వైపులా బంగారు రంగు వచ్చే వరకు నెమ్మదిగా వేయించాలి. బయట కరకరలాడుతూ, లోపల మెత్తగా ఉడికేలా చూసుకోవాలి. తర్వాత టిష్యూ పేపర్పై తీసి అదనపు నూనెను తొలగించాలి.
సర్వింగ్ టిప్స్
వేడి వేడి బొబ్బర్ల గారెలను పుదీనా చట్నీ, కొబ్బరి చట్నీ, అల్లం చట్నీ.. మిర్చి చట్నీ, టమాటా చట్నీతో తింటే రుచి మరింత పెరుగుతుంది. ఒక కప్పు వేడి టీతో కలిపి తింటే సాయంత్రం స్నాక్గా అద్భుతంగా ఉంటుంది.
ముఖ్యమైన చిట్కాలు..
పిండిని మరీ పల్చగా చేయకండి. అలా చేస్తే గారెలు నూనె ఎక్కువగా పీల్చుకుంటాయి.
మీడియం మంటపై మాత్రమే వేయించాలి. ఎక్కువ మంటపై వేస్తే బయట మాత్రమే కాలిపోతాయి.
తక్కువ నూనెతో చేయాలనుకుంటే అప్పె పాన్లో కూడా వీటిని తయారు చేసుకోవచ్చు.
పిండిలో కొద్దిగా తురిమిన క్యారెట్ లేదా పాలకూర వేసినా రుచి, పోషకాలు మరింత పెరుగుతాయి.
Click it and Unblock the Notifications
Sign in with Google