తారకరత్నకు జూ. ఎన్టీఆర్ ఫోన్

హైదరాబాద్: తెలుగుదేశం పార్టీ రాజకీయాల్లో జూనియర్ ఎన్టీఆర్ చురుగ్గా పాల్గొనబోతున్న సూచనలు కనిపిస్తున్నాయి. తెలుగుదేశం పార్టీ కార్యకలాపాలకు దూరంగా ఉండాలని నిర్ణయించుకున్న స్వర్గీయ ఎన్టీఆర్ మనవడు తారకరత్నను తమతో కలుపుకుని పోవడానికి ఆయన ప్రయత్నిస్తున్నారు. తారకరత్నకు ఎన్టీఆర్ ఫోన్ చేసి గుంటూరులో జరిగే యువగర్జన సదస్సుకు రావాల్సిందిగా కోరినట్లు సమాచారం. అదే సమయంలో ఆయన మరోసారి తెలుగుదేశం పార్టీ అధ్యక్షుడు నారా చంద్రబాబునాయుడును కలిశారు. నిర్మాణంలో తన తాజా చిత్రం నిర్మాత వంశీని వెంట బెట్టుకుని ఆయన చంద్రబాబును కలిశారు. కృష్ణా జిల్లా గన్నవరం టికెట్టును వంశీ ఆశిస్తున్నట్లు సమాచారం.

ఇదిలా వుంటే, బాలకృష్ణ రాజకీయ కార్యక్రమాల రూపకల్పనను హరికృష్ణ కుమారుడు కళ్యాణ్ రామ్ భుజాన వేసుకున్నట్లు సమాచారం. బాలకృష్ణ ప్రచార కార్యక్రమాలు ఎలా ఉండాలి, ఏ సమయాల్లో ఉండాలి అనే విషయాలను ఆయన ఖరారు చేస్తారు. గుంటూరు యువగర్జన సదస్సులో ఎన్టీఆర్ వారసులంతా ఒకే వేదిక మీదికి వచ్చిన తర్వాత కొన్ని జిల్లాల్లో ఎన్టీఆర్ విగ్రహావిష్కరణ కార్యక్రమాలు చేపడుతారు. అనంతరం బాలకృష్ణ రాయలసీమలోనూ, జూనియర్ ఎన్టీఆర్, కళ్యాణ రామ్ లు కోస్తా ప్రాంతంలోనూ పర్యటిస్తారు.