ప్రజాసేవ నటన కాదు: చిరుపై వైయస్

అనంతపురం: ప్రజాసేవ సినిమాల్లో నటన కాదని ముఖ్యమంత్రి డాక్టర్ వైయస్ రాజశేఖర రెడ్డి ప్రజారాజ్యం పార్టీ అధినేత చిరంజీవిని ఉద్దేశించి అన్నారు. అయితే ఆయన చిరంజీవి పేరును ప్రస్తావించలేదు. సినిమాల్లో నటన ఇక్కడ నడవదని చెప్పాలని ఆయన ప్రజలకు పిలుపునిచ్చారు. ఐక్య ప్రగతిశీల కమిటీ (యుపిఎ) చైర్ పర్సన్ సోనియాగాంధీ పాల్గొన్న భారీ బహిరంగ సభలో ఆయన మాట్లాడారు. వచ్చే ఎన్నికలకు సర్వసన్నద్ధంగా ఉన్నామని ఆయన చెప్పారు. వచ్చే ఎన్నికల్లో తమను ఆశీర్వదించాలని ఆయన ప్రజలను కోరారు.

తెలుగుదేశం పార్టీపై ఆయన తీవ్ర విమర్శలు చేశారు. అనంతపురం జిల్లా తెలుగుదేశం పార్టీకి కంచుకోట అనే విషయం తెలిసిందే. ఉపాధి హామీ పథకం కింద వచ్చిన బియ్యాన్ని తెలుగుదేశం పార్టీ కార్యకర్తలు పందికొక్కుల్లా తిన్నారని, తమ పాలనలో పందికొక్కులు లేవని, కాంట్రాక్టర్లు లేరని, ఉపాధి హామీ పథకం కింది లబ్ధి నేరగా రైతుకూలీలకే అందుతున్నదని ఆయన అన్నారు. తెలుగుదేశం ప్రభుత్వ హయాంలో ఆత్మహత్యలు చేసుకున్న కుటుంబాలకు లక్ష రూపాయలేసి నష్టపరిహారం ఇవ్వాలంటే అప్పటి ముఖ్యమంత్రి నారా చంద్రబాబునాయుడు నిరాకరించారని ఆయన విమర్శించారు. ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ కూడా మాట్లాడారు.