చంద్రబాబుపై రోశయ్య చిర్రుబుర్రులు

హైదరాబాద్: రాష్ట్ర ఆర్థిక మంత్రి కె. రోశయ్య తెలుగుదేశం పార్టీ అధ్యక్షుడు నారా చంద్రబాబునాయుడిపై తీవ్ర వ్యాఖ్యలు చేశారు. చంద్రబాబు మతిస్థిమితం కోల్పోయి మాట్లాడుతున్నారని ఆయన బుధవారం మీడియా ప్రతినిధుల సమావేశంలో వ్యాఖ్యానించారు. తాను ఆరు నెలల్లో అధికారంలోకి వస్తానని చంద్రబాబు కలలు కంటున్నారని, అధికారం మాటేమో గానీ ప్రధాన ప్రతిపక్షం హోదా కూడా చంద్రబాబుకు రాదని ఆయన అన్నారు. తాను అధికారంలోకి రాగానే విచారణలు జరిపిస్తానని, రద్దులు చేస్తానని అంటున్నారని, చంద్రబాబుకు ప్రతిపక్ష హోదా కూడా దక్కదని ఆయన అన్నారు.

నాలుగున్నరేళ్లలో ఎప్పుడు కూడా శాసనసభను సరిగా నడవనివ్వని ఘనత తెలుగుదేశం పార్టీదేనని ఆయన విమర్శించారు. సభ ముగిసిన తర్వాత ప్రతిపక్షాలు వేషాలు వేశాయని ఆయన వ్యాఖ్యానించారు. తానొక్కడే వేషాలు వేస్తే ప్రజలు నమ్మరని మరి కొంతమందిని కలుపుకుని నాటకాలు ఆడుతున్నారని ఆయన అన్నారు. శాసనసభలో స్పీకరుపై ప్రతిపాదించిన అవిశ్వాస తీర్మానం వీగిపోయిన తర్వాత ప్రతిపక్షాలు చేపట్టిన ఆందోళనా కార్యక్రమాలను ఆయన ఈ సందర్భంగా ఉదహరించారు.