తిరుమల శ్రీవారికి కోటి విరాళం

తిరుమల: తిరుమల వెంకటేశ్వరస్వామికి ఓ పారిశ్రామికవేత్త భారీ మొత్తంలో శుక్రవారం విరాళం అందజేశారు. ఇండియన్‌ ఎక్స్‌ప్రెస్‌ గ్రూప్‌నకు చెందిన సరోజినీ గోయంకా తిరుమలలో తితిదే ప్రత్యేకాధికారి ఎ.వి.ధర్మారెడ్డిని కలిసి రూ.కోటి విరాళాన్ని డి.డి. రూపంలో అందజేశారు. అయితే దాత కుటుంబ సభ్యులతో కలిసి స్వామి వారిని దర్శించుకునేందుకు ప్రత్యేకాధికారి కార్యాలయంలో వీఐపీ విరామ దర్శన టిక్కెట్ల కోసం వారి ప్రతినిధి ద్వారా దరఖాస్తు చేశారు.

వారికి ఆ టిక్కెట్లను ప్రత్యేకాధికారి మొదట నిరాకరించారు. ఇదే సమయంలో దాత సరోజిని గోయంక ప్రత్యేకాధికారి కార్యాలయానికి వచ్చి తాను శ్రీవారికి రూ.కోటి విరాళం ఇవ్వనున్నట్లు తెలిపారు. విరాళం శ్రీవారి ఆలయంలో ఇస్తే బాగుంటుందని ఆయన సూచించారు. ఆ మేరకు దాత అంగీకరించారు. వారిని ధర్మారెడ్డి శ్రీవారి ఆలయంలోకి తీసుకుని వెళ్లి మొదటి దర్శనం చేయించి ఆ తర్వాత రంగనాయకుల మండపంలో విరాళం అందుకున్నారు.