బాల్ థాకరే మంత్రి కేసు ఉపసంహరణ

ముంబయి: శివసేన అధ్యక్షుడు బాల్‌థాకరేపై తాను పెట్టిన పరువునష్టం కేసును మహారాష్ట్ర ప్రజాపనుల శాఖ మంత్రి, ఎన్‌సీపీ నేత చగన్‌ భుజబల్‌ శుక్రవారం ఉపసంహరించుకున్నారు. తనపై శివసేన అధికార పత్రిక సామ్నాలో వచ్చిన వ్యాఖ్యలు తన ప్రతిష్టను దెబ్బతీసే విధంగా ఉన్నాయంటూ ఆయన శివసేన అధ్యక్షుడు బాల్‌థాకరే, సామ్నా ఎడిటర్‌ సంజయ్‌ రావత్‌, పబ్లిషర్‌ సుభాష్‌దేశాయ్‌లపై పరువునష్టం దావా వేశారు.

బాల్‌థాకరే వయసును దృష్టిలో ఉంచుకుని ఈ కేసును ఉప సంహరించాల్సిందిగా కోరుతూ తనకు సంజయ్‌ రావత్‌, సుభాష్‌ దేశాయ్‌లు లేఖ రాశారని అందుకే ఈ కేసును ఉపసంహరించుకోవాలని నిర్ణయించుకున్నానని ఆయన తెలిపారు. కోర్టులో కేసును ఉపసంహరించిన అనంతరం ఆయన థాకరే ఇంటికి భోజనానికి వెళ్లారు. గతంలో శివసేన పార్టీలో పనిచేసిన ఆయన తిరిగి శివసేన పార్టీలో చేరతారని వస్తున్న ప్రచారం జరుగుతోంది. ఈ విషయాన్ని మీడియా ప్రతినిధులు ప్రస్తావించగా ఆయన దానిపై మాట్లాడడానికి నిరాకరించారు.