భూ అవినీతిపై పోరుకు బాబు పిలుపు

హైదరాబాద్: ప్రభుత్వ భూ అవినీతిపై పోరాటానికి నడుం కట్టాలని తెలుగుదేశం పార్టీ అధ్యక్షుడు నారా చంద్రబాబు నాయుడు మహిళలకు పిలుపునిచ్చారు. కేసులు పెట్టినా భయపడకుండా ప్రభుత్వం నుంచి భూములను కాపాడుకోవాలని ఆయన అన్నారు. హైదరాబాద్ సమీపంలోని ఉప్పల్ లో శుక్రవారం జరిగిన పార్టీ మహా ధర్నాను ఉద్దేశించి ఆయన ప్రసంగించారు. ప్రత్యేక ఆర్థిక మండళ్ల (సెజ్ ల) పేరుతో పేదల భూములను లాక్కుని పెద్దలకు కట్టబెడుతోందని ఆయన విమర్శించారు. పోలేపల్లి సెజ్ బాధితులకు ఆయన సంఘీభావం ప్రకటించారు. రంగారెడ్డి జిల్లా భూములను ప్రభుత్వం విపరీతంగా అమ్ముతోందని, ఈ జిల్లాలో అమ్మిన భూముల వల్ల వచ్చే డబ్బులను ముఖ్యమంత్రి వైయస్ రాజశేఖర రెడ్డి ఇడుపుల పాయలో ఖర్చు పెడుతున్నారని, ఇక్కడి డబ్బులు ఈ జిల్లాలోనే ఖర్చు పెట్టాలని ఆయన అన్నారు.

ప్రభుత్వం లక్ష కోట్ల రూపాయల విలువ చేసే భూములను అన్యాక్రాంతం చేసిందని ఆయన విమర్శించారు. తమ ప్రభుత్వ హయాంలో ఇన్ఫోసిస్ కు 30 ఎకరాల భూమి ఇచ్చామని, 30 వేల మందికి ఉపాధి కల్పించాలని షరతు విధించామని, ప్రస్తుత కాంగ్రెస్ ప్రభుత్వం 470 ఎకరాల భూమి ఇచ్చిందని, దాని వల్ల ఎంత ప్రయోజనం కలిగిందో ప్రభుత్వం వెల్లడించాలని ఆయన అన్నారు. ప్రతిష్టాత్మకమైన ఐటి కంపెనీలన్ని తమ ప్రభుత్వ హయాంలోనే రాష్ట్రానికి వచ్చాయని ఆయన చెప్పారు. పరిశ్రమలకు అడ్డూ అదుపులేకుండా వందలాది ఎకరాల భూములను కారచౌకగా ఇస్తోందని, రియల్ ఎస్టేట్ వ్యాపారాన్ని ప్రోత్సహిస్తోందని ఆయన విమర్శించారు. విశాఖపట్నంలో ఒక కంపెనీకి వేయి ఎకరాల భూమిని ఎకరా రూపాయి ధరకు అప్పగించిందని ఆయన అన్నారు. టెక్నోక్రాట్ కు 750 ఎకరాలు అప్పగించిందని ఆయన చెప్పారు.

పేదలకు, మధ్యతరగతి వారికి ఇల్లు కట్టుకునేందుకు కూడా లేకుండా భూములను ప్రభుత్వం అన్యాక్రాంతం చేస్తోందని, హౌసింగ్ బోర్డు మధ్యతరగతి ఇంటి ఆశలను సాకారం చేసేదని, ఇప్పుడు దాని భూములను పెద్దలకు అమ్ముతోందని ఆయన అన్నారు. భూముల అన్యాక్రాంతంలో పెద్ద యెత్తున అవినీతి చోటు చేసుకుందని ఆయన విమర్శించారు. ముఖ్యమంత్రి అవినీతి ఊబిలో కూరుకపోయారని ఆయన వ్యాఖ్యానించారు.