అధికార పంపకానికి ప్రజారాజ్యం నో

హైదరాబాద్: రాష్ట్రంలో అధికార పంపకం తమకు సమ్మతం కాదని ప్రజారాజ్యం పార్టీ అధికార ప్రతినిధి పరకాల ప్రభాకర్ అన్నారు. రాష్ట్రంలో ప్రతిపక్షాలన్నీ ఏకమైన అదికారాన్ని పంచుకోవాలని, సగం రోజులు తెలుగుదేశం పార్టీ అధ్యక్షుడు నారా చంద్రబాబునాయుడు, మరో సగం రోజులు ప్రజారాజ్యం పార్టీ అధినేత చిరంజీవి ముఖ్యమంత్రిగా ఉండాలని సిపిఐ రాష్ట్ర కార్యదర్శి కె. నారాయణ ప్రతిపాదించారు. తమకు ఈ ప్రతిపాదన సమ్మతం కాదని పరకాల ప్రభాకర్ శుక్రవారం మీడియా ప్రతినిధులతో చెప్పారు.

ఈ నెల 9వ తేదీ నుంచి తమ పార్టీ అధినేత చిరంజీవి రాష్ట్ర పర్యటన చేపడుతారని, ఈ పర్యటనలో పార్టీ విధివిధానాలను ప్రజల్లోకి తీసుకుపోతారని ఆయన చెప్పారు. సమాజంలో వివిధ వర్గాలకు పార్టీ అధికారంలోకి వస్తే ఏం చేయబోతున్నదో చిరంజీవి ప్రజలకు వెల్లడిస్తారని ఆయన చెప్పారు. ఒకవేళ ముందస్తు ఎన్నికలు వస్తే వాటినే తీసుకుని ఎన్నికల ప్రణాళికను రూపొందించనున్నట్లు ఆయన తెలిపారు.