పొత్తులను ఇప్పుడే తేల్చలేం: చిరు

విజయనగరం: పొత్తులను అత్యవసరంగా తేల్చలేమని ప్రజారాజ్యం పార్టీ అధినేత చిరంజీవి అన్నారు. ఆహ్వానం మేరకే తాము సిపిఎం పోలిట్ బ్యూరో సభ్యుడు సీతారాం ఏచూరితో మాట్లాడినట్లు ఆయన సోమవారం బొబ్బిలిలో మీడియా ప్రతినిధుల సమావేశంలో అన్నారు. తమకు విధానాలు ఉన్నాయని, ఏది ఎప్పుడు చెప్పాలో తమకు తెలుసునని ఆయన అన్నారు. తమ విధానాలను పార్టీలకు చెప్పడం కాదని, ప్రజలకు చెప్తామని, ఏది చెప్పడానికైనా సమయం అంటూ ఒకటి ఉంటుందని ఆయన అన్నారు.

తాను మనిషినేనని, తనకు కూడా ఆవేశకావేషాలుంటాయని, కొన్ని చోట్ల తాను ఉద్వేగపూరితంగా మాట్లాడానని ఆయన చెప్పారు. తనకు నటుడిగా లభించిన ఆదరణ వేరు, రాజకీయ నాయకుడిగా లభించిన ఆదరణ వేరు అని ఆయన అన్నారు. ప్రతి గ్రామం గంగదేవిపల్లి గ్రామం కావాలని ఆయన అన్నారు. నిఘా వైఫల్యం వల్లనే ఆదిలాబాద్ జిల్లా వట్టోలి గ్రామంలో సజీవ దహనం సంఘటన జరిగిందని ఆయన అన్నారు. బాధితులను వెంటనే ఆదుకోవాలని ఆయన ప్రభుత్వాన్ని డిమాండ్ చేశారు. ప్రజలను బట్టే తన విధానాలుంటాయని ఆయన అన్నారు. సభలకు వచ్చిన వారంతా ప్రజారాజ్యం పార్టీకి ఓట్లు వేస్తారో లేదో కాలమే సమాధానం చెబుతుందని ఆయన అన్నారు.