వైయస్ తో కృష్ణ దంపతుల భేటీ

హైదరాబాద్: సూపర్ స్టార్ కృష్ణ, ఆయన భార్య విజయనిర్మల సోమవారం ఉదయం ముఖ్యమంత్రి డాక్టర్ వైయస్ రాజశేఖర రెడ్డిని కలుసుకున్నారు. ముఖ్యమంత్రి క్యాంపు కార్యాలయంలో ఈ భేటీ జరిగింది. ముఖ్యమంత్రి డాక్టర్ వైయస్ రాజశేఖర రెడ్డిని కృష్ణ, విజయనిర్మల దంపతులు ప్రశంసలతో ముంచెత్తారు. రాజీవ్ ఆరోగ్యశ్రీ పథకాన్ని వారు కొనియాడారు. రాజీవ్ ఆరోగ్య శ్రీ పథకం ద్వారా పేదలకు కార్పోరేట్ ఆస్పత్రుల్లో వైద్యం చేయిస్తున్నారని, ఇది ఎంతో అభినందనీయమైన విషయమని కృష్ణ అన్నారు.

దేశంలో ఎవరూ అమలు చేయని అభివృద్ధి, సంక్షేమ పథకాలను రాజశేఖర రెడ్డి అమలు చేస్తున్నారని విజయనిర్మల అన్నారు. ఎంతో మంది ఈ పథకం ద్వారా లబ్ధి పొందారని ఆమె అన్నారు. వైయస్ రాజశేఖర రెడ్డి మళ్లీ ముఖ్యమంత్రి కావాలని కృష్ణ దంపతులు ఆకాంక్షించారు. ఆంధ్రప్రదేశ్ రాష్ట్రం ఎంతో సుభిక్షింగా ఉందని విజయనిర్మల అన్నారు. ఈ ప్రభుత్వాన్ని ప్రతి ఒక్కరూ కొనియాడుతున్నారని ఆమె అన్నారు.