రామోజీ దుష్ప్రచారం: కృష్ణ సోదరుడు

హైదరాబాద్: ఈనాడు గ్రూపు సంస్థల అధినేత రామోజీ రావు, ఆంధ్రజ్యోతి మేనేజింగ్ డైరెక్టర్ రాధాకృష్ణ పనిగట్టుకుని తమపై దుష్ప్రచారం చేస్తున్నారని ప్రముఖ సినీ నటుడు కృష్ణ సోదరుడు ఆదిశేషగిరి రావు అన్నారు. కృష్ణ, మహేష్ సేన సభ్యత్వ నమోదు కార్యక్రమాన్ని ఆయన శుక్రవారం ప్రారంభించారు. ఈ సందర్భంగా కృష్ణ, మహేష్ అభిమానులు ర్యాలీ తీశారు. ముఖ్యమంత్రి డాక్టర్ వైయస్ రాజశేఖర రెడ్డి విధానాలు నచ్చినందు వల్లనే తమ కుటుంబం కాంగ్రెసుకు మద్దతిస్తోందని ఆదిశేషగిరిరావు ఈ సందర్భంగా అన్నారు. వేరే కార్యక్రమాలేవీ లేక వామపక్షాలు భూపోరాటాలు చేపట్టాయని ఆయన విమర్శించారు.

కృష్ణ, మహేష్ సేన గౌరవాధ్యక్షుడిగా ఆదిశేషగిరిరావు వ్యవహరిస్తున్నారు. కృష్ణ, విజయ నిర్మల దంపతులు కాంగ్రెసుకు మద్దతు ఇదివరకే ప్రకటించారు. తమ కుటుంబం కాంగ్రెసుతోనే ఉంటుందని కృష్ణ కూడా చెప్పారు. ముఖ్యమంత్రి డాక్టర్ వైయస్ రాజశేఖర రెడ్డి అమలు చేస్తున్న పథకాలను వారు ప్రశంసించారు.