నందమూరి హీరోలు రెడీ: బాబు

హైదరాబాద్: తమ పార్టీ కోసం నందమూరి హీరోలంతా పనిచేస్తారని తెలుగుదేశం పార్టీ అధ్యక్షుడు నారా చంద్రబాబునాయుడు అన్నారు. వచ్చే నెల 5వ తేదీన జరిగే యువగర్జన సదస్సుకు హీరోలంతా వస్తారా అనే ప్రశ్నకు నేరుగా సమాధానం ఇవ్వలేదు. యువగర్జన సదస్సుకు జూనియర్ ఎన్టీఆర్ రావడానికి సుముఖత వ్యక్తం చేయడంలేదనే వార్తలు వెలువడుతున్న విషయం తెలిసిందే. పార్టీ కోసం ఎవరెవరు ఎలా భాగస్వాములు కావాలనే విషయాన్ని చర్చించి నిర్ణయిస్తామని చంద్రబాబు ఒక ప్రైవేట్ టీవీ చానెల్ ప్రతినిధితో అన్నారు. పార్టీ కోసం స్వర్గీయ ఎన్టీఆర్ కుటుంబ సభ్యులంతా ఏకం కావాలని ఆయన అన్నారు. తెలుగుదేశం పార్టీని బలోపేతం చేయడానికి నందమూరి హీరోలంతా కట్టుబడి ఉంటారని ఆయన చెప్పారు.

కాగా, యువగర్జన సదస్సుకు హైదరాబాదులో ఏర్పాట్లు జరుగుతున్నాయి. ఈ సదస్సులో బాలకృష్ణతో పాటు కళ్యాణ్ రామ్, తారకరత్న పాల్గొంటారు. మొదట జూనియర్ ఎన్టీఆర్ పాల్గొంటారని చెప్పినప్పటికీ అది సందేహంగా మారింది. తెలుగుదేశం నాయకుడు అల్లాడి రాజ్ కుమార్ గుంటూరులోని వేదిక ఏర్పాటు పనులను పర్యవేక్షిస్తున్నారు. 150 ఎకరాల మైదానంలో ఈ సదస్సుకు ఏర్పాట్లు జరుగుతున్నాయి.