ఎన్నికల్లో పోటీకి బాలకృష్ణ దూరమే

హైదరాబాద్: వచ్చే ఎన్నికల్లో ప్రముఖ సినీ నటుడు, తన వియ్యంకుడు బాలకృష్ణ పోటీ చేయబోరని తెలుగుదేశం పార్టీ అధ్యక్షుడు నారా చంద్రబాబునాయుడు చెప్పారు. బాలకృష్ణను తాము పోటీ చేయించబోవడం లేదని ఆయన గురువారం మీడియా ప్రతినిధుల సమావేశంలో చెప్పారు. బుధవారం గుంటూరు యువగర్జన సదస్సు విజయంపై ఆయన మాట్లాడారు. అనూహ్యరీతిలో యువగర్జన సదస్సు విజయం సాధించిందని ఆయన అన్నారు. రాష్ట్రంలో అప్రకటిత ఎమర్జెన్సీ కొనసాగుతోందని ఆయన విమర్శించారు.

మంత్రులు గొల్లపల్లి సూర్యారావు, జెసి దివాకర్ రెడ్డిల మధ్య గొడవను టీ కప్పులో తుఫానులాగా ఆర్థిక మంత్రి కె. రోశయ్య మాట్లాడటం సిగ్గుచేటు అని ఆయన అన్నారు. తూర్పు గోదావరి జిల్లాలో ఇసుక కుంభకోణం వ్యవహారాన్ని జిల్లా కలెక్టరు మీదికి నెట్టడం దారుణమని ఆయన అన్నారు. రాష్ట్రంలో మానసిక యుద్ధానికి కూడా కాంగ్రెస్ దిగుతోందని, కాంగ్రెస్ వారు తమ మాట వినని వారిని బెదిరిస్తున్నారని ఆయన విమర్శించారు.