బాలయ్యకు పురంధరేశ్వరి లేఖ

హైదరాబాద్‌: అధికార వ్యామోహంతో తన తండ్రి ఎన్టీఆర్‌ను ఆత్మక్షోభకు గురిచేశారని, పదవీ వ్యామోహంతో నందమూరి వారసులను పావులుగా వాడుకొంటున్నారని తెలుగుదేశం పార్టీ అధ్యక్షుడు చంద్రబాబునుద్దేశించి కేంద్ర మంత్రి పురందరేశ్వరి ఆరోపించారు. శ్రీకృష్ణపాండవీయం చిత్రంలో ''ఇంట్లో పెత్తనమంతా బావయ్యదే కాని బాబులది ఏమీ లేదు'' అనే డైలాగు అక్షర సత్యమని ఆమె వ్యాఖ్యానించారు.

ఈ మేరకు తన సోదరులు హరికృష్ణ, బాలకృష్ణలకు ఆమె బహిరంగ లేఖ రాశారు. దీంతోపాటు ఎన్టీఆర్‌ అంతిమదశలో ఇచ్చిన ఇంటర్వ్యూలు, చేసిన వ్యాఖ్యల సీడీని సోదరులకు పంపుతున్నట్లు ఆమె తెలిపారు. ఎన్టీఆర్ ఆత్మక్షోభ పేరుతో ఆమె ఒక సిడిని రూపొందించారు. చంద్రబాబుపై ఎన్టీఆర్ అంతరంగమేమిటో తెలియజేస్తూ ఆ సిడిని రూపొందించారు. ఎన్టీఆర్ స్వగతంగా సాగే ఈ సిడిలో కొంత ఎన్టీఆర్ స్వయంగా మాట్లాడిన విషయాలు ఉన్నాయి.