చిరు పార్టీలో విలీనం అబద్ధం: గౌడ్

హైదరాబాద్: తమ పార్టీని ప్రజారాజ్యం పార్టీలో విలీనం చేసేది లేదని నవ తెలంగాణ పార్టీ (ఎన్టీపి) నేత టి. దేవేందర్ గౌడ్ స్పష్టం చేశారు. తమ పార్టీని ప్రజారాజ్యం పార్టీలో విలీనం చేస్తున్నట్లు వచ్చిన వార్తలో ఏ మాత్రం నిజం లేదని ఆయన మంగళవారం మీడియా ప్రతినిధుల సమావేశంలో చెప్పారు. ఊహాగానాలు చేసి వార్తలు రాయవద్దని ఆయన మీడియాకు సూచించారు. ప్రజారాజ్యం పార్టీలో ఎన్టీపిని విలీనం చేయనున్నట్లు ఒక దినపత్రికలో వార్త వచ్చింది.

పొత్తుల గురించి ఆలోచన చేస్తున్నామని, ఎవరితో పొత్తు పెట్టుకోవాలి, పొత్తులకు ఎటువంటి ప్రాతిపదికలు కావాలనే అంశాలపై ఆలోచన చేస్తున్నమాట వాస్తవమని ఆయన చెప్పారు. ఈ నెల 24వ తేదీన జరిగే పార్టీ కార్యవర్గ సమావేశంలో పొత్తులపై నిర్ణయం తీసుకుంటామని ఆయన అన్నారు. ఈ నెల 20వ తేదీన హైదరాబాదులో బిసి సదస్సు నిర్వహించనున్నట్లు ఆయన తెలిపారు. తెలంగాణ అంశంపై ఈ నెలాఖరులో మరోసారి ఢిల్లీ వెళ్తామని ఆయన చెప్పారు.