మాది విన్నింగ్ టీమ్: కెసిఆర్

ఆదిలాబాద్: తెలుగుదేశం, వామపక్షాలు, తెరాసలది వచ్చే ఎన్నికల్లో విన్నింగ్ కాంబినేషన్ అని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు అన్నారు. డిసెంబర్ పార్లమెంటు సమావేశాల్లో తెలంగాణ రాష్ట్ర ఏర్పాటుకు బిల్లు ప్రతిపాదిస్తేనే వచ్చే ఎన్నికల్లో కాంగ్రెసుతో పొత్తు ఉంటుందని ఆయన అన్నారు. ఒక ప్రైవేట్ టీవీ చానెల్ ప్రతినిధికి ఆయన బుధవారంనాడు ఇంటర్వ్యూ ఇచ్చారు. తెలంగాణ రాష్ట్ర ఏర్పాటుకు బిల్లు ప్రతిపాదించకపోతే కాంగ్రెసు రాష్ట్రంలో మట్టి కరుస్తుందని ఆయన అన్నారు.

ప్రతిపక్షాలకు లభిస్తున్న ఆదరణను చూసి ప్రభుత్వం రోడ్ షోలను ఆపించడానికి కుట్ర చేసిందని, హైకోర్టు స్టే విధించాల్సి రావడానికి అదే కారణమని ఆయన అన్నారు. కోర్టుపై గౌరవం ఉంది కాబట్టే రోడ్ షోలను ఆపేసి బహిరంగ సభలు పెట్టుకుంటున్నామని ఆయన అన్నారు. తెలంగాణ జైత్రయాత్రలో భాగంగా ఆదిలాబాద్ జిల్లాలో నిర్వహిస్తున్న రోడ్ షోను ఆయన నిలిపేశారు. బుధవారం సాయంత్రం ఆదిలాబాద్ జిల్లా మంచిర్యాలలో బహిరంగ సభ జరుగుతుంది. ఆయన తెలంగాణ జైత్రయాత్ర బుధవారం సాయంత్రం ముగుస్తుంది.