JNTU లో ఆకలి కేకలు, కనీస మానవత్వం లేకుండా..!
కాకినాడ జవహర్లాల్ నెహ్రూ సాంకేతిక విశ్వవిద్యాలయం (JNTUK) హాస్టల్స్లో దారుణమైన పరిస్థితి నెలకొంది. హాస్టల్ మెస్ ఫీజు చెల్లించలేదనే నెపంతో విశ్వవిద్యాలయ యాజమాన్యం మెస్ను అకస్మాత్తుగా మూసివేసింది. ఈ హాస్టల్లో మొత్తం 1200 మంది విద్యార్థులు ఉండగా, సెలవుల కారణంగా ఈ నెల 17న చాలా మంది ఇళ్లకు వెళ్లిపోయారు. ప్రస్తుతం హాస్టల్లోనే ఉండిపోయిన సుమారు 200 మంది విద్యార్థినీ విద్యార్థులు యాజమాన్యం తీసుకున్న ఈ మొండి నిర్ణయం వల్ల గత మూడు రోజులుగా ఆకలితో అలమటిస్తున్నారు.
మెస్ ఫీజు బకాయిలకు సంబంధించి విద్యార్థులకు ఎలాంటి ముందస్తు సమాచారం లేదా నోటీసులు ఇవ్వకుండానే యాజమాన్యం ఏకపక్షంగా మెస్ తాళాలు వేయడంపై తీవ్ర విమర్శలు వ్యక్తమవుతున్నాయి. హాస్టల్లో భోజనం దొరకని కరవు కాలంలో, బయటకు వెళ్లలేని తప్పనిసరి పరిస్థితుల్లో విద్యార్థులు ఆన్లైన్ యాప్స్ ద్వారా ఫుడ్ ఆర్డర్ పెట్టుకుంటూ ఆర్థికంగా ఇబ్బందులు పడుతూ కాలం వెళ్లదీస్తున్నారు. ఉన్నత చదువులు చదువుకునే క్యాంపస్ హాస్టల్లో విద్యార్థులను ఇలా ఆకలితో ఉంచడంపై సర్వత్రా నిరసనలు వ్యక్తమవుతున్నాయి.
జేఎన్టీయూ యాజమాన్యం అవలంబిస్తున్న ఈ మొండి వైఖరిపై విద్యార్థి సంఘాలు తీవ్రస్థాయిలో మండిపడుతున్నాయి. కనీస మానవత్వం లేకుండా వందలాది మంది విద్యార్థులను మూడు రోజులుగా ఆకలితో అలమటించేలా చేయడం దుర్మార్గమని నగర విద్యార్థి నేతలు ధ్వజమెత్తారు. యాజమాన్యం వెంటనే స్పందించి హాస్టల్ మెస్ను పునఃప్రారంభించకపోతే విద్యార్థులందరినీ ఏకం చేసి పెద్ద ఎత్తున ఆందోళనలు, ధర్నాలు చేపడతామని విద్యార్థి సంఘాలు హెచ్చరించాయి.
Click it and Unblock the Notifications
Sign in with Google