విలాస్ రావు దేశ్ ముఖ్ రాజీనామా

ముంబయి: ముంబయి ఉగ్రవాద దాడులకు బాధ్యత వహిస్తూ మహారాష్ట్ర ముఖ్యమంత్రి విలాస్ రావు దేశ్ ముఖ్ కూడా రాజీనామా బాట పట్టారు. తన రాజీనామా లేఖ ప్రతిని ఆయన కాంగ్రెస్ పార్టీ అధ్యక్షురాలు సోనియా గాంధీకి పంపించారు. విలాస్ రావు దేశ్ ముఖ్ రాజీనామా చేస్తారనే ప్రచారం గత రెండు రోజులుగా ఊపందుకుంది. తాను రాజీనామా చేస్తానని విలాస్ రావు దేశ్ ముఖ్ శనివారం జరిగిన కాంగ్రెస్ వర్కింగ్ కమిటీ (సిడబ్ల్యుసి) సమావేశంలో చెప్పినట్లు సమాచారం.

రాష్ట్రపతి ప్రతిభా పాటిల్ ముంబయి పర్యటనకు రానున్నారు. రాష్ట్రపతి వెంట ముఖ్యమంత్రి ఉండాల్సిన అవసరం ఉంటుంది. ఈ పరిస్థితిలో విలాస్ రావు దేశ్ ముఖ్ అధికారికంగా రాజీనామా చేయలేదు. రాష్ట్రపతి పర్యటన ముగిసిన వెంటనే రేపు (మంగళవారం) ఆయన తన రాజీనామా లేఖను గవర్నరుకు సమర్పించే అవకాశం ఉన్నట్లు చెబుతున్నారు. విలాస్ రావు వారసుడిపై కాంగ్రెస్, ఎన్సీపి చర్చలు జరుపుతున్నాయి. పృథ్వీరాజ్ చవాన్ పేరు ప్రముఖంగా వినిపిస్తోంది.