ఢిల్లీ ఎయిర్ పోర్టు వద్ద కాల్పులు

న్యూఢిల్లీ: ఢిల్లీ విమానాశ్రయం వద్ద తుపాకి కాల్పులు జరిగాయనే వార్తలు రావడంతో విమానాశ్రయాన్ని దాదాపు 20 నిమిషాల పాటు నిలిపేశారు. విమానాశ్రయం ప్రవేశ ద్వారం వద్ద ఈ కాల్పులు వినిపించినట్లు సమాచారం. తెల్ల క్వాలిస్ కారు ప్రవేశ ద్వారం వైపు వెళ్తున్న సమయంలో ఆలారం మోగినట్లు చెబుతున్నారు. రెండు తుపాకి కాల్పులు వినిపించినట్లు ప్రత్యక్ష సాక్షులు చెబుతున్నారు. ఆ క్వాలిస్ కారుకు హర్యానా రిజిస్ట్రేషన్ నెంబరు ప్లేటు ఉంది.

క్వాలిస్ కారు కోసం పోలీసు బృందాలు గాలింపు చర్యలు చేపట్టాయి. కేంద్ర పారిశ్రామిక భద్రతా బలగాలు, ఢిల్లీ పోలీసులు రంగంలోకి దిగారు. విమానాశ్రయాన్ని చుట్టుముట్టారు. వెంటనే విమానాశ్రయం ద్వారాలు మూసివేశారు. ఉగ్రవాద దాడుల హెచ్చరికల నేపథ్యంలో ఇప్పటికే విమానాశ్రయం వద్ద భద్రతను పెంచారు. ఈ సంఘటనతో మూడు అంతర్జాతీయ విమానాలు ఆలస్యంగా బయలుదేరాయి.