ఢిల్లీ సిఎంగా దీక్షిత్ ప్రమాణం

న్యూఢిల్లీ: ఢిల్లీ ముఖ్యమంత్రిగా షీలా దీక్షిత్ బుధవారం ప్రమాణ స్వీకారం చేశారు. ఢిల్లీ ముఖ్యమంత్రి పీఠాన్ని ఆమె అధిష్ఠించడం వరుసగా ఇదే మూడో సారి. శాసనసభ ఎన్నికల్లో కాంగ్రెస్ పూర్తి మెజారిటీ సాధించడంతో షీలా దీక్షిత్ ముఖ్యమంత్రి అయ్యారు. లెఫ్టినెంట్ గవర్నర్ తేజేంద్ర ఖన్నా ఆమె చేత రాజభవన్ లో ప్రమాణ స్వీకారం చేయించారు. ఆమెతో పాటు ఆరుగురు మంత్రులు కూడా ప్రమాణ స్వీకారం చేశారు.

71 ఏళ్ల దీక్షిత్ పార్టీని విజయపథంలో నడిపించడంలో కీలక పాత్ర పోషించారు. 70 మంది సభ్యులు గల శాసనసభలో కాంగ్రెస్ 43 సీట్లును గెలుచుకుని మెజారిటీ సాధించింది. బిజెపికి 23 సీట్లు వచ్చాయి. ఇటీవలి కాలంలో కాంగ్రెస్ పార్టీ నుంచి ముఖ్యమంత్రి పీఠాన్ని అధిష్ఠించిన మహిళ షీలా దీక్షిత్ మాత్రమే. కాంగ్రెస్ పార్టీని ఆమె మూడో సారి విజయపథంలో నడిపించి రికార్డు సృష్టించారు.