సగానికి సగం తగ్గిన మందకృష్ణ

హైదరాబాద్: పొత్తుకు మహా కూటమి నాయకులు ముందుకు రాకపోవడంతో మాదిగ రిజర్వేషన్ పోరాట సమితి (ఎమ్మార్పీయస్) నేత మందకృష్ణ మాదిగ దిగి వచ్చారు. తాను డిమాండు చేస్తున్న సీట్లలో సగానికి సగం తగ్గించుకునేందుకు సిద్ధపడ్డారు. తమకు 15 అసెంబ్లీ స్థానాలు, రెండు పార్లమెంటు స్థానాలు ఇస్తే చాలునని ఆయన శుక్రవారం మీడియా ప్రతినిధుల సమావేశంలో అన్నారు. అంతకు ముందు ఆయన 30 శాసనసభా స్థానాలు, నాలుగు పార్లమెంటు స్థానాలు అడిగారు. తెలుగుదేశం పార్టీ అధ్యక్షుడు నారా చంద్రబాబు నాయుడు గానీ, ఇతర మహా కూటమి నేతలు గానీ ప్రతిస్పందించకపోవడంతో 48 గంటల గడువు పెట్టారు. ఆ గడువు శుక్రవారంతో ముగిసింది. గడువు కన్నా ముందే తెలుగుదేశం పార్టీ అధ్యక్షుడు నారా చంద్రబాబు నాయుడు ప్రతిస్పందించారు. ఎమ్మార్పీయస్ తమ కూటమిలో లేదని ఆయన గురువారంనాడు తేల్చి చెప్పారు.

చంద్రబాబు తాజా ప్రకటన నేపథ్యంలో మందకృష్ణ మాదిగ దిగి వచ్చారు. తాము అధికారం కోసం పోటీ చేయడం లేదని, కాంగ్రెసును ఓడించేందుకే ఎన్నికల్లో పోటీ చేయాలనుకుంటున్నామని ఆయన చెప్పారు. ఎస్సీ రిజర్వేషన్ల వర్గీకరణ సాధనకు తమ ప్రతినిధులు చట్టసభల్లో ఉండాలనేదే తమ ఉద్దేశమని ఆయన అన్నారు. ఈ నెల 23వ తేదీ లోగా మహా కూటమి నాయకులు తమతో పొత్తుపై తేల్చుకోవాలని ఆయన అన్నారు.