కాంగ్రెసోళ్లు అమ్మకి దాసులు: ఎన్టీఆర్

తాడేపల్లిగూడెం: కాంగ్రెస్ వారు అమ్మగారు సోనియా గాంధీ ముందు వంగి వంగి దండాలు పెడుతూ తెలుగువారి ఆత్మగౌరవాన్ని తాకట్టు పెడుతున్నారని సినీ నటుడు జూనియర్ ఎన్టీఆర్ వ్యాఖ్యానించారు. మహారాణికి ముఖ్యమంత్రి డాక్టర్ వైయస్ రాజశేఖర రెడ్డి ముడుపులు కడుతున్నారని ఆయన వ్యాఖ్యానించారు. ఆయన పర్యటన బుదవారంనాడు పశ్చిమ గోదావరి జిల్లాలో కొనసాగింది. కాంగ్రెసుపై ఆయన తీవ్ర వ్యాఖ్యలు చేశారు. ఐదేళ్ల కాంగ్రెసు అవినీతిలో కూరుకుపోయిందని ఆయన విమర్శించారు. గత తెలుగుదేశం పార్టీ తొమ్మిదేళ్ల పాలనలో ప్రజలకు ఎంతో మేలు జరిగిందని ఆయన అన్నారు.

కాంగ్రెసు ఐదేళ్ల పాలనలో రాష్ట్రాన్ని భ్రష్టు పట్టించారని ఆయన అన్నారు. రైతులకు ఎంతో మేలు చేశామని చెప్పుకుంటున్న కాంగ్రెస్ ఏమీ చేయలేదని, రైతులను ఆదుకుంటే ఆత్మహత్యలు ఎందుకు జరుగుతాయని ఆయన అన్నారు. తెలుగుదేశం పాలనలో యువతకు ఉపాధి అవకాశాలు పెరిగాయని ఆయన అన్నారు.