అంధకారంలో ఆంధ్రప్రదేశ్: బాలయ్య

చిత్తూరు: కాంగ్రెస్ అధికారంలో రాష్ట్రం అంధకారంలో కూరుకుపోయిందని ప్రముఖ సినీ నటుడు బాలకృష్ణ వ్యాఖ్యానించారు. తెలుగుదేశం పార్టీ తరఫున ఆయన సోమవారం చిత్తూరు జిల్లాలో ప్రచారం చేశారు. కాంగ్రెసు ప్రభుత్వంపై ఆయన తీవ్రంగా ధ్వజమెత్తారు.తెలుగుదేశం పార్టీ ఏ ఒక్క వర్గానికే చెందింది కాదని, పార్టీ అన్ని వర్గాలకు చెందిందని ఆయన చెప్పారు. పార్టీ ఆవిర్భావంతోనే సామాజిక న్యాయాన్ని పాటించినట్లు ఆయన తెలిపారు. కాంగ్రెసు పాలనలో నిత్యావసర సరుకుల ధరలు ఆకాశాన్నంటాయని ఆయన అన్నారు.

తెలుగుదేశం పార్టీ అధ్యక్షుడు నారా చంద్రబాబునాయుడు తొమ్మిదేళ్ల పాలనలో నిత్యావసర సరుకుల ధరలను అదుపు చేసినట్లు ఆయన చెప్పారు. కాంగ్రెసు పాలనలో అవినీతి పేరుకుపోయిందని ఆయన విమర్శించారు. కాంగ్రెసు పాలన అస్తవ్యస్తంగా ఉందని ఆయన అన్నారు. రైతులు గిట్టుబాటు ధరలు లభించక ఆత్మహత్యలు చేసుకుంటున్నారని ఆయన అన్నారు.