అల్లు అరవింద్ పై దాడికి యత్నం

విశాఖపట్నం: ప్రజారాజ్యం నాయకుడు, చిరంజీవి బావ మరిది అల్లు అరవింద్ పై విశాఖపట్నంలో దాడికి యత్నం జరిగింది. విశాఖపట్నం కలెక్టర్ కార్యాలయం వద్ద ఈ దాడికి ప్రయత్నం జరిగింది. టిక్కెట్ అశించి భంగపడిన కరుణకుమారి అనే నాయకురాలి అనుచరులు ఇందుకు ప్రయత్నించినట్లు సమాచారం. విశాఖ (ఉత్తరం) నియోజకవర్గానికి కరుణకుమారి ఆశించారు. అయితే ఆ టిక్కెట్ ఆమెకు లభించలేదు.

మహిళలకు సీట్ల కేటాయింపులో ప్రాధాన్యం ఇవ్వాలని డిమాండ్ చేస్తూ ప్రజారాజ్యం పార్టీ కార్యకర్తలు, కరుణకుమారి అనుచరులు అల్లు అరవింద్ ను చుట్టుముట్టారు. దీంతో పోలీసులు లాఠీచార్జీ చేసి వారిని చెదరగొట్టారు. ఆ దాడిలో అల్లు అరవింద్ కు సంబంధించిన కారు ధ్వంసమైనట్లు సమాచారం. పార్టీ మలి జాబితాను వెల్లడించడానికి అల్లు అరవింద్ విశాఖలోని ఒక హోటల్లో కసరత్తు చేశారు. ఆయన సోమవారం అనకాపల్లి నుంచి నామినేషన్ దాఖలు చేయనున్నారు.