ఎన్టీఆర్ కు కుమారస్వామి ఆహ్వానం

హైదరాబాద్: కర్ణాటకలో తెలుగువారు అధికంగా ఉన్న ప్రాంతాల్లో తమ పార్టీ తరఫున ప్రచారం చేయడానికి రావాల్సిందిగా జెడి (ఎస్) నేత, మాజీ ప్రధాని హెచ్ డి దేవెగౌడ కుమారుడు కుమారస్వామి తెలుగు సినీ నటులు బాలకృష్ణ, జూనియర్ ఎన్టీఆర్ లను ఆహ్వానించారు. వారిని తమ రాష్ట్రానికి ఆహ్వానిస్తూ ఆయన తెలుగుదేశం పార్టీ అధ్యక్షుడు నారా చంద్రబాబు నాయుడికి లేఖ రాశారు. గతంలో స్వర్గీయ ఎన్టీ రామారావు కర్ణాటకలో ప్రచారం చేసిన విషయాన్ని కూడా ఆయన ఆ లేఖలో గుర్తు చేశారు. రాష్ట్రంలో పర్యటనకే సమయం సరిపోవడం లేదని బాలకృష్ణ అన్నట్లు తెలుగుదేశం పార్టీ నాయకుడు కంభంపాటి రామ్మోహన్ గురువారం మీడియా ప్రతినిధులతో చెప్పారు. జూనియర్ ఎన్టీఆర్ ఆరోగ్యం సరిగా లేని విషయం తెలిసిందే. వీరిద్దరు కూడా కుమారస్వామి కోరికను మన్నించే స్థితిలో లేరు.

జూనియర్‌ ఎన్టీఆర్‌ ఆరోగ్యం క్రమంగా మెరుగుపడుతోంది. ఆయన బుధవారం ఓ ప్రత్యేక బెల్టు ధరించి ఆస్పత్రి కారిడార్‌లో కొద్దిసేపు నడిచారు. ఆ బెల్టు మెడ నుంచి నడుము వరకు ఉంటుందని, దాని సహాయంతో రోజూ ఉదయం, సాయంత్రం అరగంట చొప్పున నడవడానికి అనుమతిచ్చినట్లు చికిత్స చేస్తున్న వైద్యుడు శ్రీనివాస్‌ చెప్పారు. ఎన్టీఆర్‌ ప్రస్తుతానికి సాధారణ ఆహారం తీసుకుంటున్నారని, ఊపిరితిత్తుల ఇన్‌ఫెక్షన్‌ అదుపులోకి వచ్చిందని వెల్లడించారు. ఆయనకు మరో నాలుగు వారాలపాటు విశ్రాంతి అవసరమని చెప్పారు. వైద్య పరీక్షలు చేసిన అనంతరం ఆరోగ్య స్థితిని చూసి రెండు మూడు రోజుల్లో డిశ్చార్జి చేసేందుకు నిర్ణయం తీసుకుంటామని శ్రీనివాస్‌ తెలిపారు.