బొత్సా కుటుంబ పాలన: బాలకృష్ణ

విజయనగరం: విజయనగరం జిల్లాలో మంత్రి బొత్సా సత్యనారాయణ కుటుంబ పాలన సాగుతోందని సినీ నటుడు, తెలుగుదేశం పార్టీ నాయకుడు బాలకృష్ణ వ్యాఖ్యానించారు. నలుగురు కుటుంబ సభ్యులకు టిక్కెట్లు ఇప్పించుకున్న ఘనత బొత్సా సత్యనారాయణది అని ఆయన వ్యంగ్యంగా అన్నారు. విజయనగరం జిల్లాలో రెండో రోజు శుక్రవారం ఆయన రోడ్ షోలు నిర్వహించారు. తెలుగుదేశం పార్టీని గెలిపించాలని ఆయన ప్రజలకు విజ్ఞప్తి చేశారు.

కాంగ్రెసు పాలనలో రాష్ట్రం అంధకారమయం, అవినీతిమయం అయిపోయిందని ఆయన విమర్శించారు. రాష్ట్రంలో నిత్యావసర సరుకుల ధరలు పెరిగిపోయాయని, ప్రజల కష్టాలు కాంగ్రెసు ప్రభుత్వానికి పట్టడం లేదని ఆయన అన్నారు. కాంగ్రెసు నాయకులు కుక్క మూతి పిందెలని, వాడిపోతారు, రాలిపోతారని ఆయన అన్నారు. కాంగ్రెసు పాలనలో దళారులు రెచ్చిపోతున్నారని ఆయన అన్నారు. ఇతర పార్టీల వద్ద డబ్బు తీసుకోండి కానీ ఓటు మాత్రం తెలుగుదేశం పార్టీకి వేయండని ఆయన ప్రజలకు సూచించారు.