జయప్రదపై మరదలి ఫిర్యాదు

చెన్నై: కుటుంబ కలహాలు జయప్రద ఎన్నికల ప్రచారానికి అడ్డంకి కాబోతున్నాయా? జయప్రద తమ్ముడు రాజ్ బాబుకు ఆయన భార్య ఉషాబాబుకు మధ్య చాలాకాలంగా సయోధ్య లేదు. రాజ్ బాబు, వారి తొమ్మిదేళ్ళ కుమారుడు రాజా ముత్తు సామ్రాట్ జయప్రద ఇంట్లోనే ఉంటున్నారు. ఉత్తరప్రదేశ్ రామ్ పూర్ లోక్ సభ స్ధానం నుంచి సమాజ్ వాది పార్టీ తరఫున జయప్రద పోటీ చేస్తున్న విషయం తెలిసిందే. గత ఎన్నికల్లో ఆమె ఇక్కడినుంచి గట్టెక్కినా ఈసారి ఆమె ముస్లిం మైనారీటీ అభ్యర్ధి నుంచి తీవ్ర పోటీను ఎదుర్కొంటున్నారు.

అందువల్ల జయప్రద సెంటిమెంట్ కోసం తన తమ్ముడి కుమారుడిని వెంటేసుకుని ప్రచారం చేస్తున్నారు. తొమ్మిదేళ్ళ చిన్నారిని జయప్రద ఎన్నికల ప్రచారానికి వాడుకుంటున్నారంటూ, అందుకు ఆధారంగా పేపర్ క్లిప్పింగ్స్ ను జత చేసి మరదలు ఆమెపై మద్రాసు హైకోర్టులో పిటిషన్ వేశారు. తన కుమారుడిని ఎండల్లో ఎన్నికల ప్రచారంలో తిప్పడం వల్ల అతని ఆరోగ్యం దెబ్బతింటుందని, ఆ కుర్రాడిని జయప్రదతో ప్రచారానికి వెళ్ళకుండా చూడాలని ఎన్నికల సంఘాన్ని ఆదేశించవలసిందిగా ఉషాబాబు కోర్టును కోరింది.