పోలింగ్: ఇవియంల మొరాయింపు

హైదరాబాద్: రాష్ట్రంలో తొలి విడత ఎన్నికల పోలింగ్ గురువారం ఉదయం ప్రారంభమైంది. తొలి విడత రాష్ట్రంలోని 154 శాసనసభా స్థానాలకు, 22 లోకసభ స్థానాలకు పోలింగ్ జరుగుతోంది. ఈ స్థానాలన్నీ తెలంగాణకు, ఉత్తరాంధ్రకు చెందినవి. ఉదయం 7 గంటలకు పోలింగ్ ప్రారంభమైంది. ఉదయం నుంచే ఓటర్లు పోలింగ్ కేంద్రాల వద్ద బారులు తీరి కనిపించారు. సాయంత్రం 4 గంటల వరకు పోలింగ్ జరుగుతుంది.

తొలి విడత పోలింగ్ జరుగుతున్న అన్ని జిల్లాల్లోనూ పలు చోట్ల ఎలక్ట్రానిక్ ఓటింగ్ యంత్రాలు మొరాయించిన సంఘటనలు చోటు చేసుకున్నాయి. దీంతో పోలింగ్ అర గంట, గంట ఆలస్యంగా ప్రారంభమైన ఉదంతాలు చాలా చోట్ల కనిపిస్తున్నాయి. ఈ విషయంపై హైదరాబాదులోని ఖైరతాబాద్ శాసనసభ నియోజకవర్గం తెలుగుదేశం పార్టీ అభ్యర్థి విజయరామారావు అసహనం వ్యక్తం చేశారు. మంత్రి ధర్మాన ప్రసాదరావు శ్రీకాకుళం జిల్లాలో తన ఓటు హక్కును వినియోగించారు. ప్రస్తుతం పోలింగ్ జరుగుతున్న ప్రాంతాలకు మావోయిస్టుల నుంచి ముప్పు ఉండటంతో గట్టి బందోబస్తును ఏర్పాటు చేశారు.

తొలి విడతలో తెలంగాణ రాష్ట్ర సమితి అధ్యక్షుడు కె.చంద్రశేఖరరావు, శాసనసభ స్పీకర్ కెఆర్ సురేష్ రెడ్డి, కేంద్ర మంత్రులు రేణుకా చౌదరి, పురంధేశ్వరి, మంత్రులు పొన్నాల లక్ష్మయ్య, గీతారెడ్డి, ఫరీదుద్దీన్, బిజెపి జాతీయ కార్యదర్శి ఎన్.ఇంద్రసేనారెడ్డి వంటి ప్రముఖులు పోటీలో ఉన్నారు.