హైదరాబాదుకు విదేశీయులం: వైయస్

నంద్యాల: తెలుగుదేశం పార్టీ అధికారంలోకి వస్తే హైదరాబాదుకు మనం విదేశీయులమవుతామని ముఖ్యమంత్రి డాక్టర్ వైయస్ రాజశేఖరరెడ్డి అన్నారు. కర్నూలు జిల్లాలో ఆయన గురువారం ప్రచారం నిర్వహించారు. నంద్యాల ఎన్నికల ప్రచార సభలో ఆయన తెలంగాణ రాష్ట్ర సమితి (తెరాస), తెలుగుదేశం, ప్రజారాజ్యం పార్టీలపై తీవ్ర విమర్శలు చేశారు. తెలుగుదేశం పార్టీ అధికారంలోకి వస్తే హైదరాబాదు మనది కాకుండా పోతుందని ఆయన అన్నారు. హైదరాబాదులో కాలేజీ పెట్టుకోకూడదని, వ్యాపారం చేయకూడదని తెరాస అధ్యక్షుడు కె. చంద్రశేఖరరావు అంటున్నారని ఆయు గుర్తు చేశారు.

చంద్రశేఖరరావు పోతిరెడ్డి ప్రాజెక్టును వ్యతిరేకిస్తున్నారని, తెలుగుదేశం పార్టీ అధికారంలోకి వస్తే పోతిరెడ్డి పాడు, పులిచింతల, పోలవరం ప్రాజెక్టులు రావని ఆయన అన్నారు. ప్రజారాజ్యం పార్టీ అధినేత చిరంజీవిపై ఆయన విమర్శలు చేశారు. చిరంజీవి రాజకీయమంటే రెండు గంటల సినిమా అనుకుంటున్నారని ఆయన అన్నారు.