వైయస్ వి పిచ్చి వ్యాఖ్యలు: బాబు

విజయవాడ: ముఖ్యమంత్రి డాక్టర్ వైయస్ రాజశేఖర రెడ్డివి పిచ్చి ప్రసంగాలని తెలుగుదేశం పార్టీ అధ్యక్షుడు నారా చంద్రబాబు నాయుడు వ్యాఖ్యానించారు. కృష్ణా జిల్లాలోని కైకలూరు తదితర ప్రాంతాల్లో ఆయన శుక్రవారం ఎన్నికల ప్రచారం నిర్వహించారు. తెలంగాణపై వైయస్ వ్యాఖ్యలను ప్రస్తావిస్తూ ఆయన ఆ విధంగా అన్నారు. ముఖ్యమంత్రి రాజకీయ జీవితమంతా నేరమయమని ఆయన ఆరోపించారు.

కాంగ్రెసు ప్రభుత్వం అవినీతిలో కూరుకుపోయిందని ఆయన అన్నారు. ముఖ్యమంత్రి డాక్టర్ వైయస్ రాజశేఖర రెడ్డిపై ఆయన తీవ్ర విమర్శలు చేశారు. తాము ఇచ్చిన హామీల గురించి ఆయన వివరించారు. నగదు బదిలీ పథకం వంటి వాటిని ఆయన వివరించారు. కొల్లేరువాసులకు న్యాయం చేసిందే తామేనని ఆయన చెప్పుకున్నారు. కొల్లేరువాసికి టిక్కెట్టు ఇచ్చింది కూడా తామేనని ఆయన అన్నారు. ఓటమి భయంతోనే వైయస్ పిచ్చి ప్రేలాపనలకు దిగుతున్నారని ఆయన వ్యాఖ్యానించారు.