ఉగ్రవాదులు బీజేపీ అతిధులు: సోనియా

ఫరూక్‌ బాద్‌: బీజేపీ నేతృత్వంలోని ప్రభుత్వం ఉగ్రవాదులను అతిథిల మాదిరిగా వారి సొంత దేశాలకు పంపించిందని సోనియా ధ్వజమెత్తారు. కాంగ్రెస్‌ పార్టీ ఉగ్రవాదం పట్ల మెతకవైఖరిని ప్రదర్శిస్తోందన్న బీజేపీ వ్యాఖ్యలు హాస్యాస్పదమని కాంగ్రెస్‌ పార్టీ నేత సోనియా గాంధీ వ్యాఖ్యానించారు. కాంగ్రెస్‌ పార్టీ అభ్యర్థి సల్మాన్‌ ఖుర్షీద్‌కు మద్దతుగా జరిగిన ఎన్నికల ర్యాలీలో ఆమె ఈ వ్యాఖ్యలు చేశారు. కాంగ్రెస్‌ పార్టీ ఉగ్రవాదాన్ని సమర్థవంతం గా తిప్పికొడుతోందని అన్నారు.

అలాగే 2004లో ఎన్డీఏ నినాదం 'భారత్‌ వెలిగిపోతోంది'పై ఆమె విమర్శలు గుప్పించారు. "రైతులు, యువత భవిష్యత్తు అంధకారంలో ఉన్నప్పుడు.. భాజపాకు దేశం వెలిగిపోతున్నట్లు కనిపించింది" అని ఎద్దేవా చేశారు. ఆర్థిక మాంద్యంతో ప్రపంచమంతా అల్లాడుతున్నా..భారత్‌పై పెద్దగా ప్రభావం చూపించకపోవడానికి యూపీఏ సర్కారు చేపట్టిన విధానాలే కారణమని చెప్పారు. ఈ సందర్భంగా ఉత్తరప్రదేశ్‌ సీఎం మాయావతిపైనావిరుచుకుపడ్డారు. బీఎస్పీ హయాంలో అవినీతి తారస్థాయికి చేరిందని పేర్కొన్నారు.

'ఇందిరాగాంధీ, రాజీవ్‌గాంధీ దేశం కోసం తమ ప్రాణాలు పోగొట్టుకున్న సంగతి దేశప్రజలందరికీ తెలుసు' అని సోనియా అన్నారు. ఉగ్రవాదాన్ని తమ పార్టీ ఉక్కుపాదంతో అణిచేస్తుందని అన్నారు. ఉగ్రవాదంపై బోధనలు ఆపి సొంత వైఫల్యాలపై దృష్టిసారించాలని బీజేపీకి సోనియా అన్నారు.