కాంగ్రెస్ ఫార్ములా నచ్చలేదు: కరుణ

న్యూఢిల్లీ: మంత్రి పదవుల విషయంలో తమకు కాంగ్రెసు ఫార్ములా నచ్చలేదని డిఎంకె నేత కరుణానిధి చెప్పారు. తాము యుపిఎకు వెలుపలి నుంచే మద్దతిస్తామని ఆయన చెప్పారు. చెన్నైకి బయలుదేరే ముందు ఆయన శుక్రవారం ఉదయం మీడియా ప్రతినిధులతో మాట్లాడారు. కాంగ్రెసు ఫార్ములాపై తమ పార్టీ కార్యవర్గంలో చర్చిస్తామని ఆయన చెప్పారు. కార్యవర్గంలో చర్చించిన తర్వాత ఏం చేయాలనేది నిర్ణయించుకుంటామని ఆయన చెప్పారు.

ప్రస్తుతానికి మన్మోహన్ సింగ్ ప్రభుత్వంలో చేరకూడదని డిఎంకె నిర్ణయించుకున్నట్లు తెలుస్తోంది. కాంగ్రెసుతో మంత్రిత్వ శాఖల విషయంలో ప్రతిష్టంభన ఏర్పడడంతో డిఎంకె ఆ నిర్ణయానికి వచ్చినట్లు సమాచారం. కాంగ్రెసు తమను చిన్నచూపు చూస్తోందని డిఎంకె ఆవేదన వ్యక్తం చేస్తోంది. తృణమూల్ కాంగ్రెసుకు, ఎన్సీపికి ఇస్తున్న ప్రాధాన్యం తమకు ఇవ్వడం లేదని అభిప్రాయపడుతోంది.