కాంగ్రెసు గూటికి కృష్ణంరాజు?

హైదరాబాద్: ప్రజారాజ్యం పార్టీ నాయకుడు, సినీ నటుడు కృష్ణంరాజు కాంగ్రెసు పార్టీలో చేరే అవకాశాలున్నాయి. మంగళవారం ముఖ్యమంత్రి వైఎస్‌ రాజశేఖరరెడ్డిని ఆయన క్యాంపు కార్యాలయంలో కలిశారు. రెండోసారి ముఖ్యమంత్రిగా ఎన్నికైన నేపథ్యంలో శుభాకాంక్షలు తెలిపేందుకు కలిశానని ఆయన మీడియా ప్రతినిధులతో చెప్పారు. అయితే, కృష్ణంరాజు కాంగ్రెస్‌ పార్టీలో చేరే అవకాశముందని ప్రచారం జరుగుతోంది. దీనిపై మీడియా ప్రతినిధులు ప్రశ్నించగా అలాంటిదేమైనా ఉంటే చెబుతా కదా! అని ఆనయ జవాబిచ్చారు.

బిజెపి నుంచి ప్రజారాజ్యంలో చేరి రాజమండ్రి నుంచి లోకసభకు పోటీ చేసి కృష్ణంరాజు ఓడిపోయారు. నిజానికి ఆయన నర్సాపురం టిక్కెట్ ఆశించారు. ఈ విషయాన్ని అప్పట్లో కృష్ణంరాజు స్వయంగా చెప్పారు. అయినా నాయకత్వ నిర్ణయం ప్రకారం ఆయన రాజమండ్రి నుంచి పోటీ చేయక తప్పలేదు. ఎన్నికలకు ముందే కృష్ణంరాజు కాంగ్రెసు పార్టీలో చేరుతారనే ప్రచారం జరిగింది.