కల్వకుర్తి నిర్మాణ సంస్థపై చర్యలు: సిఎం

హైదరాబాద్‌: కల్వకుర్తి ఎత్తిపోతల పథకం పనుల్లో జాప్యం చేస్తున్న నిర్మాణ సంస్థపై చర్యలు తీసుకోవాలని ముఖ్యమంత్రి డాక్టర్ వైయస్ రాజశేఖర రెడ్డి అధికారులను ఆదేశించారు. ఎల్లంపల్లి పంప్ హౌస్ నిర్మాణంలో జాప్యం చేస్తున్న కంపెనీకి నిర్మాణం పూర్తయ్యే దాకా చెల్లింపులు జరపవద్దని కూడా ఆయన ఆదేశించారు. సూక్ష్మ సేద్యంపై దృష్టి పెట్టాలని ఆయన సూచించారు. తెలంగాణా, ఆంధ్ర ప్రాంతంలోని సాగునీటి ప్రాజెక్టులపై ముఖ్యమంత్రి రాజశేఖరరెడ్డి బుధవారం సమీక్ష జరిపారు.

భారీ నీటిపారుదల శాఖ మంత్రి పొన్నాల లక్ష్మయ్య, ఆ శాఖ ఉన్నతాధికారులు ఈ సమావేశంలో పాల్గొన్నారు. ప్రధానంగా ప్రాణహిత, చేవెళ్ల, దేవాదుల ప్రాజెక్టుల పరిస్థితి, నిధుల సేకరణ, ఇతర ప్రాజెక్టుల పురోగతిని సమీక్షించనున్నారు. మహారాష్ట్ర ప్రభుత్వం అక్రమంగా నిర్మిస్తున్న ప్రాజెక్టుపై సుప్రీంకోర్టులో ధిక్కారం కేసు వేస్తామని భారీ నీటి పారుదల శాఖ మంత్రి పొన్నాల లక్ష్మయ్య చెప్పారు.