ప్రజల్లోకి వెళ్లకుంటే సహించం: వైయస్

హైదరాబాద్‌: ప్రజల్లోకి వెళ్లని తమ కాంగ్రెస్ పార్టీ నేతలను ఉపేక్షించబోమని ముఖ్యమంత్రి డాక్టర్ వైయస్ రాజశేఖర రెడ్డి హెచ్చరించారు. కరీంనగర్ జిల్లాలో పార్టీ పరిస్థితిపై ఆయన గురువారం ఉదయం తన క్యాంపు కార్యాలయంలో సమీక్షించారు. ఈ సందర్భంగా ఆయన ఆ హెచ్చరిక చేశారు. ఈ సమీక్షా సమావేశంలో మంత్రులు శ్రీధర్ బాబు, జూపల్లి కృష్ణారావు, తదితరులు పాల్గొన్నారు.

ప్రభుత్వ కార్యక్రమాలను ప్రజల్లోకి తీసికెళ్లడానికి సమర్థంగా పని చేయాలని ముఖ్యమంత్రి సూచించినట్లు జూపల్లి కృష్ణారావు చెప్పారు. ఎన్నికల్లో వచ్చిన ఫలితాలపై సూక్ష్మ పరిశీలన జరిపినట్లు శ్రీధర్ బాబు మీడియా ప్రతినిధులతో చెప్పారు. కాంగ్రెసు ఓట్ల శాతం ఎందుకు తగ్గిందనేది కూడా పరిశీలన జరిపినట్లు ఆయన తెలిపారు. కాంగ్రెసు పార్టీ ఓట్ల శాతాన్ని పెంచడానికి నాయకులు సమర్థంగా పనిచేయాలని ముఖ్యమంత్రి సూచించినట్లు ఆయన చెప్పారు.