ప్రధానికి కాంగ్రెసు పూర్తి మద్దతు

న్యూఢిల్లీ: ఈజిప్టులో చేసిన భారత, పాక్ సంయుక్త ప్రకటనపై ఎట్టకేలకు ప్రధాని డాక్టర్ మన్మోహన్ సింగ్ కు పూర్తి మద్దతు ప్రకటిస్తూ కాంగ్రెసు బహిరంగంగా ముందుకు వచ్చింది. ఈజిప్టులో భారత ప్రధాని మన్మోహన్ సింగ్ పాకిస్తాన్ ప్రధాని గిలానీతో కలిసి చేసిన సంయుక్త ప్రకటనపై విమర్శలు వెల్లువెత్తాయి. కాంగ్రెసులోని ప్రణబ్ ముఖర్జీ వంటి సీనియర్లు కూడా సంయుక్త ప్రకటనపై అసంతృప్తితో ఉన్నట్లు వార్తలు వచ్చాయి.

పాక్, భారత్ ల సంయుక్త ప్రకటనపై ఈ నెల 29వ తేదీన ప్రధాని పార్లమెంటులో ప్రకటన చేస్తారని, దాంతో అన్ని ప్రశ్నలకు, సందేహాలకు సమాధానం లభిస్తుందని కాంగ్రెసు ప్రధాన కార్యదర్శి జనార్దన్ పూజారి అన్నారు.పాక్, భారత్ సంయుక్త ప్రకటనపై భిన్నాభిప్రాయాలు వద్దని పార్టీ అధ్యక్షురాలు సోనియా గాంధీ ఇప్పటికే పార్టీ నాయకులకు సూచించారు. ఈ విషయంలో ప్రధానికి పూర్తి మద్దతుగా నిలవాలని ఆమె ఆదేశించారు కూడా.