బాబు ప్రజలదే తప్పంటాడు: సిఎం

హైదరాబాద్: తమకు ఓటేయని తెలుగుదేశం పార్టీ అధ్యక్షుడు నారా చంద్రబాబు నాయుడు ప్రజలదే తప్పంటాడని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. మంగళవారం శాసనసభలో ఆయన చంద్రబాబుపై తీవ్ర వ్యాఖ్యలు చేశారు. చంద్రబాబు ఏ స్పృహలో ఉన్నారో తెలియడం లేదని ప్రజలు తమ విశ్వసనీయతకు ఓటేశారని ఆయన అన్నారు. ఇవియంల తప్పు వల్లనే తాము గెలవలేదని చంద్రబాబు అంటున్నారని, ఫలితాల వెల్లడికి ముందు ఎన్నికల సంఘం ప్రధానాధికారి సుబ్బారావును ప్రశంసించారని, ఇవియంల్లో అక్రమాలు జరిగితే సుబ్బారావే చేసి ఉండాలి కదా అని ఆయన అన్నారు.

తమ ఐదేళ్ల పాలనపై ప్రజలు తీర్పు చెప్పారని ముఖ్యమంత్రి అన్నారు. తాము బాగా పని చేశామని, చెప్పిన మాట నిలబెట్టుకుంటామని భావించి ప్రజలు తమకు ఓటేశారని ఆయన అన్నారు. 108 వంటి మంచి పనులు చేసినందుకు తమను ఆదరించారని, ఇటువంటి పనులు ఇంకా చేయాలని తమకు ఓటేశారని ఆయన అన్నారు.

సభ సమావేశమైన వెంటనే ప్రతిపక్షాలు ప్రతిపాదించిన వాయిదా తీర్మానాలను స్పీకర్ కిరణ్ కుమార్ రెడ్డి తిరస్కరించారు. వివిధ అంశాలపై ప్రతిపక్షాలు వాయిదా తీర్మానాలు ప్రతిపాదించాయి. బడ్జెట్ సమావేశాల చర్చలో వాయిదా తీర్మానాలకు అనుమతివ్వబోమని స్పీకర్ చెప్పారు.