అసెంబ్లీ: రోశయ్య వ్యాఖ్యలపై రభస

హైదరాబాద్: తెలుగుదేశం శాసనసభ్యుడు గాలి ముద్దు కృష్ణమనాయుడిపై శాసనసభా వ్యవహారాల మంత్రి కె. రోశయ్య మంగళవారం చేసిన వ్యాఖ్యలపై బుధవారం శాసనసభ దద్ధరిల్లింది. గాలి ముద్దుకృష్ణమనాయుడిపై అనుచిత వ్యాఖ్యలు చేసిన రోశయ్య క్షమాపణలు చెప్పాలని తెలుగుదేశం పార్టీ సభ్యులు డిమాండ్ చేస్తూ ఆందోళన చేశారు. దీంతో సభా కార్యక్రమాలు స్తంభించాయి. తెలుగుదేశం సభ్యులు పట్టు వీడకపోవడంతో స్పీకర్ కిరణ్ కుమార్ రెడ్డి సభను అర్థాంతరంగా రేపటికి వాయిదా వేసి వెళ్లిపోయారు.

రోశయ్య వ్యాఖ్యలపై చర్యకు తెలుగుదేశం సభ్యులు పట్టుబట్టడంతో తాను రికార్డులు పరిశీలించి తగిన చర్యలు తీసుకుంటానని స్పీకర్ కిరణ్ కుమార్ రెడ్డి చెప్పారు. అయినా వారు వినలేదు. మంత్రి రోశయ్య సభలో ఉన్న సమయంలో మాట్లాడేందుకు గాలి ముద్దు కృష్ణమ నాయుడికి అవకాశం ఇస్తానని కూడా ఆయన చెప్పారు. తాను ఎంతగా చెప్పినప్పటికీ తెలుగుదేశం సభ్యులు తమ పట్టును వీడకపోవడంతో స్పీకర్ సభను రేపటికి వాయిదా వేశారు. గాలి ముద్దుకృష్ణమ నాయుడిపై రోశయ్య మంగళవారం శాసనసభలో తీవ్ర వ్యాఖ్యలు చేసిన విషయం తెలిసిందే. నువ్వు మొగాడివా, సిగ్గూశరం ఉందా అంటూ రోశయ్య గాలి ముద్దుకృష్ణమ నాయుడిపై ఆయన విరుచుకుపడ్డారు.