బాబు హుందాగా చెప్పారు: చిరు

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు హుందా మాట్లాడారని ప్రజారాజ్యం శాసనసభా పక్ష నేత చిరంజీవి అన్నారు. తాము ప్రజాసమస్యలపైనే చర్చిస్తామని, వ్యక్తిగతంగా రెచ్చగొట్టినా రెచ్చిపోమని చంద్రబాబు చెప్పడం బాగుందని ఆయన అన్నారు. గాలి ముద్దుకృష్ణమనాయుడిపై చేసిన వ్యాఖ్యలను మంత్రి రోశయ్య ఉపసంహరించుకున్న తర్వాత ఆయన గురువారం శాసనసభలో మాట్లాడారు. నిన్నటి వేడి చూసిన తర్వాత సభ తిరిగ చల్లబడుతుందని, ఇంత ఆహ్లాదకరంగా మారుతుందని తాను అనుకోలేదని, ఇంత అహ్లాదకరంగా మారడం ఆనందంగా ఉందని ఆయన అన్నారు.

వ్యక్తిగతంగా తీసుకుని ఎవరిది పైచేయి అవుతోందనే ఆలోచనతో ముందుకు వెళ్లకూడదని, ప్రజా సమస్యలపై కలిసికట్టుగా వ్యవహరిద్దామని ఆయన సూచించారు. అభిప్రాయభేదాలు ఉండవచ్చు గానీ ప్రజా సమస్యల పరిష్కారం దిశగా వెళ్లడానికి అవి అడ్డంకి కారాదని ఆయన అన్నారు. భార్యాభర్తల మధ్య గొడవలు వస్తాయని, వాటిని పరిష్కరించుకుని ముందుకు వెళ్తారని, అలాగే మనమూ వెళ్దామని ఆయన అన్నారు. నిన్నటి వేడి తగ్గి సభ ఆహ్లాదకరంగా మారడం సంతోషంగా ఉందని ఆయన అన్నారు. ఈటెల రాజేందర్ (తెరాస), జి.కిషన్ రెడ్డి, జూలకంటి రంగారెడ్డి (సిపిఎం) తదితరులు మాట్లాడారు.