బాబుపై హక్కుల కమిటీకి ఫిర్యాదు

హైదరాబాద్: స్పీకర్ కిరణ్ కుమార్ రెడ్డిపై అనుచిత వ్యాఖ్యలు చేసినందుకు తెలుగుదేశం పార్టీ అధ్యక్షుడు నారా చంద్రబాబు నాయుడిపై, శాసనసభ్యుడు గాలి ముద్దు కృష్ణమనాయుడిపై కాంగ్రెస్ శాసనసభా పక్షం (సిఎల్పీ) సభా హక్కుల కమిటీకి ఫిర్యాదు చేసింది. వారిపై చర్యలు తీసుకోవాలని కాంగ్రెసు నేతలు మల్లు భట్టి విక్రమార్క, తదితరులు సభా హక్కుల కమిటీని కోరారు. అంతకు ముందు సభ ప్రారంభం కాగానే స్పీకర్ సభ్యులనుద్దేశించి ప్రసంగించారు. తాను కూడా మనిషినేనని, తాను పరుషంగా మాట్లాడినందుకు తనను అర్థం చేసుకోవాలని ఆయన అన్నారు.

గోదావరి నదిపై మహారాష్ట్ర ప్రభుత్వం అక్రమంగా నిర్మిస్తున్న సాగు నీటి ప్రాజెక్టులపై ప్రతిపక్షాలు ప్రతిపాదించిన వాయిదా తీర్మానాన్ని స్పీకర్ కిరణ్ కుమార్ రెడ్డి తిరస్కరించారు. దీంతో ప్రతిపక్షాల సభ్యులు నిరసన తెలిపారు. గాలి ముద్దు కృష్ణమనాయుడిపై చేసిన వ్యాఖ్యలను మంత్రి కె. రోశయ్య ఉపసంహరించుకున్న తర్వాత పరుషంగా మాట్లాడినందుకు స్పీకర్ విచారం వ్యక్తం చేశారు. ఈ వ్యవహారం ముగిసిన తర్వాత సజావుగా ప్రశ్నోత్తరాల సమయం ప్రారంభమైంది.