నక్సల్స్ నేత అమర్ కు బెయిల్

హైదరాబాద్: నక్సలైట్ నేత అమర్ కు గురువారం బెయిల్ మంజూరైంది. దీంతో హైదరాబాదులోని చర్లపల్లి జైలు నుంచి ఆయన విడుదలయ్యే అవకాశం ఉంది. ఆయన విడుదల కోసం ఆయన భార్య విమల, అభిమానులు, ప్రముఖ కవి కెజి సత్యమూర్తి అలియాస్ శివసాగర్ జైలు వెలుపల నిరీక్షిస్తున్నారు. సిపిఐ (ఎంఎల్) జనశక్తి రాష్ట్ర కమిటీ కార్యదర్శి అయిన అమర్ కు కరీంనగర్ జిల్లా సిరిసిల్లా కోర్టు బెయిల్ మంజూరు చేసింది.

అమర్ ను అక్రమాయుధాల కేసులో పోలీసులు పూణేలో 2004 ఏప్రిల్ లో అరెస్టు చేశారు. అంతకు ముందు ఆయన ప్రభుత్వంతో నక్సలైట్లు జరిపిన చర్చల్లో పాల్గొన్నారు. అమర్ పై మెదక్, నల్లగొండ, కరీంనగర్ జిల్లాల్లో కేసులు నమోదయ్యాయి. అయనపై ఇప్పటి వరకు 16 కేసులను వివిధ కోర్టులు కొట్టేశాయి. ప్రస్తుతం ఆయనపై భూ ఆక్రమణ కేసుతో పాటు అక్రమాయుధాల కేసు మాత్రమే ఉన్నాయి. ఆయన సోదరుడు, జనశక్తి అగ్రనేత రాజన్న కేర్ ఆస్పత్రిలో చికిత్స పొందుతున్నాడు. విడుదలైన వెంటనే అమర్ రాజన్న వద్దకు వెళ్లనున్నారు. జైలు నుంచి విడుదలైన తర్వాత అమర్ తిరిగి అజ్ఝాతంలోకి వెళ్తారా, బయటే ఉండి ఉద్యమాన్ని నడిపిస్తారా అనేది ఆసక్తిగా మారింది.