నిషేధాలు ఏమీ చేయలేవు: అమర్

హైదరాబాద్: సమాజంలో ఆకలిదప్పులు ఉన్నంత వరకు నిషేధాలు విప్లవ పార్టీలను ఏమీ చేయలేవని జనశక్తి రాష్ట్ర కమిటీ కార్యదర్శి అమర్ అన్నారు. సిరిసిల్ల కోర్టు బెయిల్ మంజూరు చేయడంతో ఆయన గురువారం హైదరాబాదులోని చర్లపల్లి జైలు నుంచి విడుదలయ్యారు. విప్లవ పార్టీల నిర్మూలన జరగదని ఆయన మీడియా ప్రతినిధులతో చర్లపల్లి జైలు వద్ద అన్నారు. తన భవిష్య్తత్తు కార్యక్రమాన్ని పార్టీయే నిర్ణయిస్తుందని ఆయన ఒక ప్రశ్నకు సమాధానంగా చెప్పారు.

ఇప్పటి వరకు తాను ప్రజా ఉద్యమాల్లో మానసిక పోరాటం చేశానని, ఇక నుంచి సమస్యలపై భౌతిక పోరాటం చేస్తానని ఆయన చెప్పారు. ప్రజా ఉద్యమాలు ప్రతిపక్ష పాత్రను పోషిస్తున్నాయని, ప్రజా ఉద్యమాల వల్లనే దేశంలో భూసంస్కరణలు అమలవుతున్నాయని ఆయన చెప్పారు. పార్లమెంటుతో సంబంధం లేని చారు మజుందార్ మరణించిన పార్లమెంటు ఘన నివాళి అర్పించడం అందుకు నిదర్శనమని ఆయన ఆయన అన్నారు. అర్హత గల ఖైదీల విడుదలకు ప్రభుత్వం జారీ చేసిన జీవోను ఆయన స్వాగతించారు.