దావూద్ ను అప్పగించడం లేదు: కృష్ణ

న్యూఢిల్లీ: దావూద్ ఇబ్రహీంతో పాటు 42 మంది నిందితులను అప్పగించాలని తాము కోరుతున్నప్పటికీ పాకిస్తాన్ సహకరించడం లేదని భారత విదేశాంగ మంత్రి ఎస్ ఎం కృష్ణ గురువారం రాజ్యసభలో చెప్పారు. 1993 ముంబై వరుస బాంబు పేలుళ్ల కేసులోనూ, ముంబై దాడుల కేసులోనూ నిందితులైన 42 మంది పాక్, భారత జాతీయుల జాబితాను తాము పాకిస్తాన్ అందజేసినట్లు ఆయన తెలిపారు.

భారత్ జాతీయులైన దావూద్ ఇబ్రహీం, టైగర్ మెమెన్, ఛోటా షకీల్, లక్బీర్ సింగ్ వంటి వారు తమ దేశంలో లేరని పాకిస్తాన్ అంటోందని ఆయన చెప్పారు. పాకిస్తాన్ జాతీయులను అప్పగించాలని అడిగినప్పుడు అప్పగింత ఒప్పందాలు లేవని, వారిపై సాక్ష్యాధారాలు లేవని అంటోందని ఆయన చెప్పారు.నేరస్తుల అప్పగింత కోసం పాకిస్తాన్ తో ఒప్పందం చేసుకోవడానికి తాము 11 విఫలయత్నాలు చేసినట్లు ఆయన తెలిపారు.